Rapport di Algemene Rekenkamer Aruba ta papia un palabra cla
- Acceso, calidad y cuido pagabel ta dicidi pa cuido efectivo di salud
- Autoridad financiero di Aruba ta papia na momento crucial pa salud
ORANJESTAD(AAN)- Central pa DIARIO e ultimo siman aki tabata e desaroyonan sumamente peligroso cu a surgi pa salud di e Arubiano a base di sucesonan na Hospital.
E postura cu DIARIO a tuma for di e prome momento cu e problemanan na hospital a rementa y henter proyecto di hospital nobo cu a costa Pueblo di Aruba un tesoro, ta parce di ta naufraga, a haya sosten den e documento di Algemene Rekenkamer Aruba, e autoridad riba usa di placa di Pueblo.
Den su documento, Algemene Rekenkamer Aruba cu ta investiga y como tribunal financiero di Aruba ta duna su veridicto riba tur loke ta trata placa di Pueblo, ta papia di e responsabilidad grandi cu maneho politico mester practica ora ta trata Salud di Pueblo.
Den esaki central ta keda e forma cu ta hiba e maneho financiero di Salud Publico.
E postura di DIARIO pa exigi investigacion y caminda ta necesario accion di Parlamento enfrente loke a pasa cu hospital di Aruba, ta haya tur sosten den e documento di Algemene Rekenkamer Aruba, cu ta mustra riba e lugar importante cu e maneho financiero ta ocupa den maneho di e pais.
Algemene Rekenkamer ta pone enfasis riba e tres puntonan importante pa dicidi riba e nivel di maneho di Salud Publico di e pais y den esaki ta confirma tambe e posicion di DIARIO basa riba loke riba tereno internacional ta wordo considera e maneho necesario pa Salud Publico.
Cuido medico mester ta basa riba accesibilidad, loke nifica cu tur miembro di comunidad mester por haci uso di cuido medico sin estorbo.
Manera DIARIO a presenta, ora ta atende cu bon cuido medico, no ta papia di cinco strea pero di maneho determina cu ta deshaci di tur estorbo pa tur hende por goza di un bon nivel di cuido medico.
E calidad di cuido medico mester ta na nivel internacionalmente aceptabel y mester ta pagabel pa un comunidad, cu mester por cubri e gastonan di su sistema medico cu e fondo cu e tin.
Den su rapport Algemene Rekenkamer Aruba ta mustra riba e accionnan cu Gobierno di Aruba a tuma pa enfrenta e pandemia Covid-19 pero awor mester sigui traha riba e base fuerte di Salud Publico.
DIARIO den e proximo dianan aki lo sigui elabora riba e rapport y tur loke ta importante pa aporta na salida di Aruba for di e zona di peliger den cual su Salud Publico a wordo pusha pa motibo di e maneho di fantasia cu sumanan enorme di Pueblo di Aruba, cu tambe ta un punto cu sigur ta haya atencion di e rapport cu ta mustra cu gastonan di Cuido Medico mester por wordo cubri tur momento.
Esaki ta e motibo pa papia di e necesidad di creacion di un reserva, cu DIARIO tambe semper a presenta como exigencia ora ta papia di un maneho responsabel.
No por pone Salud di Pueblo na peliger y no por tuma riesgonan ta bini dilanti den e rapport di Algemene Rekenkamer Aruba, cu ta duna contenido na e obhetivanan pa yega na un cuido medico di acuerdo cu e maneho sostenibel pa eleva hende manera ta e meta di Nacionnan Uni.
Cu Aruba mester busca asistencia profesional pa atende cu su organisacion di Salud Publico ta otro punto cu ta bini dilanti y cu a haya tur atencion di DIARIO, cu den e dianan venidero lo duna Aruba tur informacion pa asina sigura un mihor calidad di bida basa riba un mihor calidad di Salud Publico na Aruba.
