Magaly Maduro, Coordinador FCVR:
ORANJESTAD (AAN) – Magaly Maduro, coordinador di Fundacion Contra Violencia Relacional (FCVR), a comenta den un entrevista cu DIARIO, cu e fundacion tin hopi trabao, tanto den e parti curativo como preventivo.
Magaly Maduro a expresa cu e fundacion ta haciendo su maximo esfuerzo. Cifranan di aña pasa a ta indica cu mas di 300 persona ambulante a acerca e fundacion aña pasa. 40 hende muher a keda den shelter y 80 mucha. Kiermen, e ta necesario y no ta caba di un dia pa otro, pero e fundacion tin cu keda traha y no 'give up'.
Tin varios factor cu ta induci na agresion domestico, segun Magaly Maduro a señala. E ta hopi hinca den nos forma di biba, cu ta hopi dificil pa los esaki.
El a subraya cu den area di Caribe y Latinoamerica, hopi cos a wordo normaliza, unda ta wordo mira caba como normal, cu den un relacion por tin pushamento, agresion verbal, y fisico.
E cifranan di maltrato ta mustra mas den personanan hoben cu den edad grandi. No solamente ta birando den edadnan hoben, pero mas hoben (teenagers) y esaki ta algo pa preocupa.
E ta un mal señal den e comunidad y pa trata e problema mas trempan. Magaly Maduro a indica cu e fundacion su trabao ta bay sigui manera te aworaki, cu samenwerking pa scolnan, charla pa mayornan, y e tin di haber cu ambiente di cas tambe, con trempan e yiunan ta cuminza un relacion.
Mester papia cu nan kico un relacion sano ta y con nan por bin cerca e yiu como mayor, duna nan e confianza cu nan por bin cu tur sorto di tema, cu si bin den e relacion cu algo di agresion, cu e mayor por papia cu nan yiu, cu nan por sali di e relacion ey. Hopi mayor ta bisa cu internet ta ganando nan.
Maduro a comenta cu esaki ta berdad, y e siman aki a haci un estudio na Hulanda door di un instancia, cu nan cliente mas hoben cu tin 9 aña, y esey ta sumamente alarmante. E tin di haber cu un persona di su mesun edad, cu ta pidi potret di e mucha muher sin paña.
