Premier Wever-Croes a traspasa cartera di Energia na Minister Glenbert Croes

Pa prome biaha Aruba tin un “energy policy” - ORANJESTAD (AAN) — Minister Presidente, Evelyn Wever-Croes, a traspasa e cartera di Energia na Minister Glenbert Croes, ken despues di e huramentacion lo ta e minister encarga cu energia.

E dignatario a duna di conoce cu e huramentacion mes lo tuma lugar e fin di siman aki, pero ya caba el a cuminza prepara tur cos, pa asina por haci e traspaso.

“Ya caba prome cu eleccion, un tempo prome cu gobierno a cay, mi a pidi tur minister pa prepara un ‘overdraft document’, pa asina cada un di nan traspasa tur e carteranan y informacion pa esun cu bin despues di nos”, Minister Presidente a indica.

Premier Wever-Croes a bisa cu nan sa caba con e gobierno lo wordo forma, y cual ta e carteranan cu, en todo caso, cada un di nan lo no tin mas den e siguiente gobierno, y eseynan nan ta traspasando.

“Pues awe ta toca e prome cu ta energia cu minister Glenbert Croes ta keda encarga cune, y nos a repasa tur locual cu nos a haci durante e casi cuater añanan aki, di cual mester bisa cu un di e documentonan mas importante ta un maneho di energia. Pa prome biaha Aruba tin un ‘energy policy’ cu no ta publica ainda, pero ta finaliza si. Nos kier a publike, pero net ora gobierno a cay, nos no tabata kier pa e ta parti di e campaña electoral y pesey awo e minister nobo lo publike” Prome Minister a duna di conoce.

E maneho aki a wordo traha door di tur e stakeholders di energia na Aruba; tur a duna nan contribucion den tres cumbre, den tres “energy summit”. Y nan punto di bista hunto a wordo inclui den e documento, con Aruba ta bay cumpli cu e tratado di Paris di 2050. “Esaki ta un di e documentonan crucial y e bon di esaki ta cu por fin awo, cu Aruba pa prome biaha den historia tin un documento di maneho , nos a bin na remarca pa haya fondo Union Europeo. Tin 900 mil Euro pa por ehecuta e maneho aki” Premier Wever-Croes a declara, agregando cu esaki ta un noticia cu el a caba di haya den e dianan aki. “Y kico ta mas bunita pa un minister nobo cu ta drenta, cu haya e maneho traha, y e fondonan tambe pa ehecut'e”, e dignatario a reitera.

Potret Facebook Page Gabinete Wever-Croes