ORANJESTAD (AAN): AZV a divulga un video informativo unda nan ta indica cu hopi hende cu a bira malo di COVID-19 ainda ta sufriendo di sintoma lunanan despues.
Cientificonan a sigui observa pa 7 luna largo casi 4000 hende den 56 pais cu tin of tabata tin Covid-19 di duracion largo pa haya sa ki sintomanan nan tur a experencia.
E mayoria di e participantenan den e estudio aki tabata hende muher entre edad di 30 pa 60 aña (30-39 aña: 24.1%; 40-49 aña: 31% y 50-59 aña: 25%).
Mas di 91% di hende cu Covid di duracion largo den e estudio aki tabata tin mester di mas di 35 siman pa recupera completamente.
Ta enfoca riba e grupo aki cu despues di 6 luna ainda tabata tin kehonan. Den total por lo menos 230 diferente sintoma a wordo detecta.
Personanan cu despues di 6 luna ainda tabata tin kehonan tin un averahe di 14 sintoma. Esakinan ta e sintomanan mas comun:
Casi henter e grupo aki a experiencia cansancio ainda despues di 6 luna. Na di dos lugar, tin pashentnan cu ta experiencia malestar post-extercional cu ta nifica cu e pashent ta bolbe bira malo (recaida) despues di esfuerzo mental of fisico of por ehempel door di stress.
'Brain fog' of mente nubla, ta yega na posicion tres di e kehonan mas comun. Aki ta na unda e pashent ta sufri di problemanan di memoria of concentracion y no ta sinti full skerpi na tino.
No sa e causa di hopi di e sintomanan aki ainda. Tampoco no ta sigur si tur e sintomanan menciona ta un resultado directo di e infeccion cu Covid.
Covid di duracion largo ta causa problema na trabao tambe.
Di e 3700 participante na e estudio aki casi mitad di nan ta trahando menos cu prome cu ora nan a bira malo cu Covid. 22% no ta trahando mes mas. Esaki debi na e hecho cu nan no por haci e trabao necesario of pasobra nan no ta logra haya trabao cu por wordo ahusta na nan limitacion(nan) pa motibo di e malesa di Covid.
