Premier Wever-Croes a asisti na conferencia di FTA riba tema di flexibilisacion laboral

ORANJESTAD (AAN): Diaranson 15 di september, Prome Minister Evelyn Wever-Croes a asisti na e apertura di e conferencia di FTA.

E tema di e Conferencia ta ‘Flexibilisacion di nos leynan laboral’. Na e ocasion oradornan a comparti nan vision riba e tema y a indica e riesgonan cu mester tene cuenta cu ne y tambe a indica condicionnan cu mester ta na luga pa por tin un flexibilisacion exitoso.

            Un aña y mey pasa e pandemia a bati na nos porta y henter comunidad mester a hala faha mara. Sinembargo, e clase trahado, especialmente esun den e sector di horeca, ta esun mas afecta. E clase trahado a haci hopi sacrificio y mester a custuma cu hopi cambio den bida, trabou y tal ves un mas cu otro.

            Como parti di implementacion di e “landspakket uitvoeringsagenda”, a acorda cu Hulanda cu lo conduci un analisis integral di leynan relaciona cu e sector laboral na Aruba. E obhetivo di e analisi aki ta pa facilita e proceso di decision cu mester tuma luga den cuadro di actualisacion y modernisacion di e mercado laboral di Aruba.

            Segun Prome Minister a splica, un flexibilisacion riba e mercado laboral cu ta pone e posicion di e trahado, su siguridad y/of su entrada na riesgo, no ta e flexibilisacion cu ta buscando.

            Al contrario, e flexibilisacion cu ta buscando ta uno caminda cu e empleado ta mas flexibel pa atende mas trabou caminda cu tin cambionan cu ta bin, pero semper teniendo cuenta cu e derecho di e trahado y su proteccion.

            Por ultimo Premier den nomber di Gobierno di Aruba, a expresa su gratitud na tur trahado pa e aporte/ sacrificio cu nan a haci pa Aruba por a cuminsa sali for di e crisis.

            “Awo nos ta wak nos dilanti retonan grandi, pero na mes momento tambe recuperacion. Si tur cos bay bon, pa december nos lo ta cerando aña cu recuperacion di nos turismo di entre 70% - 80% cual ta hopi bon.

            Aworakinan Aruba ta conta riba cada un di nos pa por logra recupera. Y mi ta pidi pa ban haci esaki hunto. Mi ta felicita FTA pa tuma e topico y organisa un conferencia rond di dje y mi ta desea tur participante hopi exito den e dianan di conferncia,’ Prome Minister Wever-Croes a termina bisando.