ORANJESTAD (AAN) -- Minister Presidente a splica minister Glenbert Croes, durante e traspaso di e cartera di energia na su man,
cu den e tema di e refineria tin hopi cos andando, unda e tin cu finaliza e proceso. E mandatario a menciona esaki den su relato, informando tocante dicho traspaso.
“Loke mi a logra si, den e añanan aki, ta saca Aruba for di e contrato cu Citgo, habri destaho publico pa busca mas interesado y aworaki e minister nobo por finaliza e proceso. Pa loke ta trata WEB nos a logra baha prijs di awa y coriente. Di coriente cu 10% pa uso residencial y awa specialmente pa e cunukeronan y aworaki e minister nobo tin un reto grandi, pasobra pa otro aña e gastonan di fuel ta bay aumenta, y ohala cu e por sali afo hunto cu WEB sin cu mester pasa e gastonan ey riba comunidad”, e dignatario a acentua.
El a señala cu tambe pa e otro companianan el a logra cosnan grandi y awo e ta contento di por traspasa esaki, y e ta sigur cu den man di Glenbert Croes, energia lo ta bon cuida!
Potret Facebook Page Gabinete Wever-Croes
