Opinion Publico - ORANJESTAD (AAN): Un dama di edad grandi biba na San Nicolas, a indica na DIARIO cu el a keda disgusta cu loke nan a informe riba Diaranson.
El a bisa cu antes e tabata laga yena su papelnan di Aangiftebiljet na YMCA. Pero esey no ta wordo haci mas. Aña pasa mes el a haci esey via e servicio cu Departamento di Impuesto (DIMP) mes ta duna na ciudadanonna.
Riba Diaranson el a dicidi na yama DIMP pa asina pidi un cita pa nan yude cu yena su Aangiftebiljet.
“Mi a yama, y mi a haya un meneer na telefon, cu a bisami cu nan no ta haci esey mes,” e dama a splica.
El a puntra di con, y nan a bise cu Ministro a prohibi nan di yuda hende e aña aki.
E dama a keda hopi desapunta, y no ta compronde di con Gobierno ta haci esaki cu pensionadonan. “Ta asina e Partido na mando ta bisa cu nan tin hende grandi central?”
E ta spera cu Gobierno nobo cu ta sinta den dianan venidero lo bay cambia e decision inhumano aki, cu ta anti-pensionado tambe pa colmo.
