ORANJESTAD (AAN): Riba Diahuebs, Colegio Arubano a duna di conoce na e 291 candidatonan di Havo y 69 candidatonan di Vwo, cu a haci examen den e prome periodo, ken a logra nan diploma.
Despues di e prome periodo, e cantidad di graduado pa Havo ta 61% y pa Vwo ta 70%.
E candidatonan pa examen cu no a gradua ainda, por haci examen den periodo 2, desde 14 di juni. Dia 2 di juli nan ta haya resultado.
E aña aki tabata posibel cu e candidatonan por a scoge pa haci examen durante dos periodo. Esaki a haci cu e porcentahe di graduado despues di e prome periodo ta mas abou. E candidatonan aki lo haci examen den periodo 2 y haci her den periodo 3. Di e alumnonan cu a haci tur examen durante prome periodo, e cantidad pa Havo ta 79% y pa Vwo 89%
DIARIO a compronde cu e resultado ta un compliment grandi pa tur e candidatonan y henter e personal di Colegio Arubano, cu a haci esaki posibel. A pesar di tabata travesando un pandemia den un aña yen di incertidumbre, hunto nos a logra haci lo miho di dje.
Aña pasa, 300 candidato di Havo y 92 di Vwo a haci examen. Di esakinan, 58% di esnan di Havo a gradua y y 72% di Vwo a gradua despues di e prome periodo.
DIARIO ta felicita e Rector nobo, Tim Croes cu a resultado aki. E alumnonan a haya sa kende a gradua, den forma di drive-by, unda e famia y e alumno ta drenta cu auto for di Shakespearestraat, pasa door di tereno di Colegio, y na muraya di lokaalnan casi dilanti por a mira resultado.
https://diario.aw/ar/categories/noticia/general/porcentahe-di-graduado-na-colegio-arubano-ta-79-pa-havo-y-89-pa-vwo#sigProId39446dd919