ORANJESTAD (AAN): Dialuna merdia 7 di juni a tuma luga den cuadro di Sociaal Crisis Plan y lidera pa e Departamento Mucha y Hoben bou guia di Sue-Ann Ras y Michella Steenvoorde Lacle,
e tayer pa bin cu miho palabracion cu diferente instancianan den con pa traha miho huntu ora ta trata di divorcio entre mayornan. Candidato di Partido MEP, Michella Steenvoorde Laclé a elabora mas tocante esaki.
Den cuadro di preparacionan pa cu e concept landsverodening cu pronto lo worde trata den Parlamento pa bin cu Plan di Mayor Obligatorio, ya caba ta trahando riba e structura pa su implementacion. Dicho ley ta conta cu un sosten amplio den e gremionan y a reuni cu stakeholdersnan pa asina hunto palabra riba e vision pa implementacion.
Den cuadro di continuacion di trabaonan di Sociaal Crisis Plan 2, e ley di Plan di mayor obligatorio den cual mayornan cu ta bay separa lo mester palabra den un contracto con nan lo reparti nan responsabilidadnan pa cu nan yiunan. E ley lo worde salvaguardia na Departamento pa Mucha y Hoben. Asina Señora Michella Steenvoorde – Laclé, presidente di cie. Voortgezet Ouderschap a splica tur e gremionan presente. Na Departamento pa Hoben y Mucha ta bay tin un afdeling Plan di Mayor (Ouderschapsplan)
E tarea di e departamento ey bou di supervision di cie. Voortgezet Ouderschap y den samenwerking estrecho cu e gremionan lo ta:
(1) Desaroya y maneha programanan preventivo y firma convenionan di trabao cu e NGO’s y departamentonan concerni pa loke ta trata ayudo di e mucha cu ta sufriendo un separacion di su mayornan.
(2) Desaroya y maneha programanan preventivo y firma convenionan di trabao cu e NGO’s y departamentonan concerni pa loke ta trata ayudo di e mayornan pa loke ta trata mediacion prome/durante un separacion.
(3) Desaroya y maneha programanan pa maneho di datos y estudionan relevante pa evalua/adapta y desaroya e maneho rond di e tema di separacion y e derechonan di e mucha pa cu esaki.
(4) Desaroya y maneha programanan informativo rond di e tema aki y traha palabracionnan concreto cu e gremionan pa traha mas uniforma.
(5) Desaroya y maneha hunto cu e gremionan un “Kind Check” pa casonan di divorcio compleho bou di un colaboracion estrecho cu GEA/OM/Orde van Advocaten & Sociaal Maatschappelijk Werkers.
Den e atardi aki a intercambia pensamento y e expertonan a duna tambe nan punto di bista y nan tipnan adicional pa extra ideanan kico mas lo mester pensa riba dje pa cu e ehecucion di esaki. Trabaonan importante y pasonan concreto, pa traha hunto pa trece solucionnan pa pone derecho di nos muchanan central.
