ORANJESTAD (AAN)-- Director di Stichting Monumentenfonds, Anne Witsenburg, a duna di conoce den conferencia di prensa,
cu despues cu nan a cumpra e monumento na Steenweg-19, Monumentenbureau a dune e seyo di monumento proteha.
Esaki ta algo hopi importante pasobra nan tin 37 monumento proteha na Aruba, aworaki, y cada bez cu Monumentenbureau ta pone e seyo riba nan, pa Monumentenfonds ta un orguyo tambe.
“E futuro, eigenlijk, no ta den nos man. Manera por ripara ta falta hopi paden. Nos tin cu traha plafond y vloer nobo, y murayanan. Y nos no sa kico e lo ta; por ta un oficina, un restaurant, hotel…ami no sa! Pero locual mi por bisa si, ta cu aki dos ora mi tin reunion cu un posible huurdo, y ban spera cu lo haya un resultado, despues cu e tabata un tienda, un botica, despues El Mercado, e lo haya un di cuater bida, pronto. Ora nos sa ken ta bira e huurdo y cu nos firma un acuerdo di huur, nos lo cuminza cu e di dos fase, pa asina adapta e parti interior di e edificio aki, na e necesidad di e usuario.
Por imagina cu un restaurant ta rekeri full otro cu un oficina, of algo otro. Asina nos por garantiza cu e edificio aki na Steenweg-19 lo tey pa futuro generacionnan di Aruba, y cu su historia ta keda na bida”, director di Monumentenfonds, Anne Witsenburg a conclui.
