ORANJESTAD (AAN) -- Segun opinion di un ciudadano, e prijsnan pa huur di apartamento a subi masha hopi na Aruba, incluso por bisa cu na un manera exagera.
E mes a pasa den un caminda di cruz pa haya un apartamento cu dos camber, sala hunto cu cushina y un baño, pa 1.300 florin y den un bario basta paden di e caminda grandi di Santa Cruz, unda Arubus no ta pasa ni mes. Ningun servicio ta inclui.
Pero el a keda conforme toch, pasobra loke el a wak algun apartamento bunita enberdad y algun ta inclui servicio, por ehemplo cable, pero prijs no mas abao di 1.500 florin y cu un camber so. Algun cu mueble pa un prijs di 1700 florin, cu realmente no ta na alcance di su posibilidadnan.
Na e momentonan aki cu hopi hende ta pasando ainda den duro, pasobra tur e consecuencianan di Covid-19 tey, nan no a bay, y asina mes tur cos ta caro, esnan cu tin e comercio for di cuminda te huur di cas, no tin compasion ni den e situacion cu nos ta den dje.
E ciudadano a conta cu e no a keda sin trabao pero durante 2020 nan a baha su oranan di trabao pa mitad di dia, y mester a bay biba cerca un ruman, pero e tin un mucha chikito pa alimenta y tabata dificil cu mitad salario. Pero awo, el a bin bek na su horario di ocho ora, y a dicidi pa busca atrobe un lugar pa biba cu su yiuchi, aunke sigur hopi gradici cu su ruman, pero e sa cu ningun di dos tabata tin nan propio espacio.
Pero nunca el a pensa cu lo tabata asina dificil pa haya un apartamento bek, chikito, cu un pida patio apenas pa colga paña, y na un prijs asina caro. E ta kere cu Huur Commissie of Departamento di Economia, mester eherce control riba esaki, pasobra loke ta tumando lugar ta simplemente abuso.
