Politiconan na Curaçao ta mira cu e asunto di cobransa pa musica via DucaPro lo bay trece cupo di trabao na peligro

WILLEMSTAD: Riba Diabierna, e politiconan di Partido MAN-PIN na Curaçao a emiti nan opinion riba e asunto di cobramento di Derecho di Autor y Administracion di Licencia pa cu musica, via di e organizacion di DucaPro.

   Na nan opinion, artistanan local na Curaçao, hunto cu emisoranan, Horeca y Gobierno mester uni den asunto di cobra pa derechonan di autor.

Ya algun tempo tin un disputa entre e organizacion DucaPro y stakeholdernan local tocante cobramento di licencia pa por haci uzo di obranan musical na Curaçao. DucaPro, esta Dutch Caribbean Performing Rights Organization, tin como tarea representacion di autor y artistanan local y internacional, y cobra pa uso di nan obranan. DucaPro a sigui cu su empeño na Aruba y e menaza pa e polemica yega Curaçao ta real. Partidonan MAN-PIN ta convenci cu autornan di obranan musical local, emisoranan, horeca y organizadonan di evento hunto cu gobierno di Curaçao mester actua rapido pa evita cu e polemica ta escala den desventaha di henter comunidad.

   Informacionnan veridico cu MAN-PIN ta dispone di dje ta indica, cu e organizacion DucaPro a cera un acuerdo cu SOCAN pa administra derechonan di autor na Aruba, Curaçao, Bonaire y St. Maarten. SOCAN ta un organizacion Canades cu ta administra licencia pa uzo di musica. Den Reino tambe tin organizacionnan similar manera BUMA y STEMRA. Generalmente e organizacionnan aki tin como meta pa proteha derech’i autornan di obranan musical rond mundo. Esaki riba su mes ta husto.

   Administracion di licencia y cobramento di derech’i autor y otro derechonan den e forma presenta pa DucaPro sin embargo ta crea un problema cu por afecta desaroyonan socio-economico y cultural na Curaçao di forma basta negativo.  Partido MAN-PIN a resumi e puntonan problematico mas principal:

   (1) Informacionnan cu ta circula den media ta haci mencion di un suma di 3,000 Florin pa luna pa licencia pa emisoranan. Esaki lo aumenta gastonan di haci negoshi y afecta entrada di emisoranan local. Consecuentemente, cuponan di trabao di esnan cu ta labora den e sector por ta na peliger.

   (2) Tambe, ta logico cu e sector, cu ta genera entrada pa medio di propaganda, lo subi su tarifanan pa cubri e gasto aki. Esaki lo aumenta gastonan di companianan local y finalmente ta e consumido ta paga mas, mientras cada dia Curaçao ta bira mas caro.

   (3) Mescos ta conta pa establecimentonan manera hotel, restaurant, cafe y organizadornan di fiesta. Pago pa licencia na DucaPro lo nifica un aumento di gasto cu finalmente ta e consumido lo paga.

   (4) Pero, den caso cu no yega na un acuerdo, DucaPro por busca su derechi den corte. Si nos ta conciente cu aki ta trata di tanto obranan local registra (p.e. na ASCAP of BUMA/STEMRA) como obranan di autornan di pafo di nos isla, empresanan local lo ta lomba contra muraya den tal caso. E opcion pa no toca ningun obra di autornan di exterior of local cu obranan registra, tampoco ta real. Un gran cantidad di autornan local lo keda gravemente perhudica, dado caso cu emisoranan stop di toca nan obranan. Den un caso asina, henter nos desaroyo cultural ta na peliger.

   (5) Establecimentonan cu ta fiha riba bishitantenan di exterior y ta ofrece musica internacional den nan establecimento lo sufri y cu esaki nos producto turistico.

   (6) DucaPro ta fiha e prijs di licencia basa riba su propio metodo. Haciendo esey, empresanan ta keda na mersed di DucaPro sin tene cuenta cu empresanan hopi chikito of esnan cu meramente ta genera entrada pa cubri nan gastonan coriente.

   Gobierno su man ta mara? Partidonan MAN-PIN ta considera cu aki gobierno mester tuma rienda di e asunto. Tin diferente sector enbolbi cu interesnan grandi cu por ta conflictivo pa cu otro.

   Recomendacion: Partido MAN-PIN ta indica cu Gobierno of ministernan encarga cu cultura, entretenimento y horeca por regula tarifanan pa licencia den caso cu interes general ta na peliger. Haciendo esey, gobierno por exonera empresanan cu por keda afecta di un manera cu licencia y cobramento no ta mina nan existencia. Tambe gobierno por negosha cu DucaPro na nomber di tur sector enbolbi, pa sigura cu den caso cu administra derechonan di autor y otronan local, practicamente tur entrada ta bay bek pa e autor, pa desaroyo cultural y turistico y desaroyo di media. Gobierno mester percura cu ta un parti chikito so por keda uza pa administracion. Pa haci esey tur actornan enbolbi y esnan cu lo por keda afecta mester sera cabes y di un manera transparente yega na un acercamento conhunto.