Otmar Oduber, Lider Plataforma Nos Pais:
ORANJESTAD (AAN) Lider di Plataforma Nos Pais, Otmar Oduber, a expresa den conferencia di prensa, Dialuna mainta, cu “Politica ta meti diki diki den Ministerio Publico”! El a bolbe vocifera cu e ta inocente den e caso Flamingo y cu e ta determina pa prueba esaki!
El a expresa cu e forma con e ta mira cu Ministerio Publico ta atende cu e caso Flamingo, ta totalmente pa no aproba. El a enfoca riba e hecho cu no solamente ya caba tin casi cuater aña y mey cu ta wardando riba e proceso, pa loke ta toca e investigacion cu ta tumando lugar, y e tardanza enorme, fuera di e cantidad di infraccionnan y inhusticia cu a sosode den henter e proceso aki. m
“Mi persona ta determina y mi a bisa cu mi ta bay prueba mi inocencia den Corte y naturalmente pafo di Corte, y sigui splica comunidad kico ta pasando”, Oduber a enfatiza.
Lider di Plataforma Nos Pais a relata cuater punto, pa duna un update tocante kico ta pasando cu Flamingo.
“Manera ta conoci a dura mas cu ocho luna pa e GVOnan cuminza, despues cu e Huez a wordo apunta door di Hulanda, na November aña pasa, a duna nos 31 testigo cu a wordo aproba pa nos scucha di nobo, pasobra no tin claridad den e caso.
“Un di nan mes, Huez a pone atencion riba dje cu ta ex-minister Marisol Lopez-Tromp cu a bisa cu tin hopi cos cu no ta cuadra den e investigacion aki, pa cual no solamente ami a pidie como testigo, pero Huez a pidi tambe pa scucha Marisol Lopez-Tromp di nobo”, Oduber a bisa.
Kico a sosode? “Inhusticianan cu, naturalmente, awe mi ta denuncia ta pa e proceso di husticia na Aruba pa ken cu ta, pa cualkier ciudadano, cu por ta tumando lugar na e momentonan aki”, Otmar Oduber a indica, agregando cu un di e testigonan principal den e caso aki, tabata un polis local di Aruba, cu tabata hefe di e departamento cu nan ta yama “Bureau Criminele Intelligentie” (BCI) di KPA cu ta esun cu a traha tur e rapportnan contra su persona, aparentemente na aña 2019 caba ora cu e tabata minister y a sali na cla na 2022, tempo cu el a wordo deteni y hiba KIA, y nan kier a sigui extende su estadia den KIA, pero a sali pa motibo cu Huez a mira cu no tin motibo pa tine deteni.
Oduber a sigui bisa cu na momento cu e funcionario di BCI, cu a traha na total siete rapport engañoso contra dje, y tabata practicamente un testigo principal, a wordo yama pa declara, a resulta cu el a fayece. E rapportnan tabata basa riba falsificacion, Oduber a subraya, y no ta su mes conclusion sino cu Ministerio Publico mes despues di a cuminza un investigacion durante dos aña, a realiza cu tur e informacionnan di A te Z no tabata clop cu e berdad, pa cual a lata tur siete rapport cay y ningun di nan, e base di e caso Flamingo, no a bay door. Asina Otmar Oduber a señala.
“Politica ta meti dikidiki den Ministerio Publico aki na Aruba! Con bo kier pa OM wordo respeta?” Otmar Oduber a remarca. Den e siguiente edicion lo tin mas di e conferencia di prensa aki.
