ORANJESTAD (AAN) — E coordinadora di IBiSA Kamp, Cindy Peña, den conferencia di prensa den cuadro di e actividad aki,
e elabora tocante e programa cu IBiSA tin planea pa e muchanan cu lo participa.
Na prome lugar Cindy a menciona e website via cual e mayornan por registra nan yiu, esta www.ibisa.aw, den cual por mira e poster di cada localidad, y e ora ey mayor ta primi esun cu ta di su preferencia y registra su yiu.
“E ta importante pa recalca cu ora bo haci e pago bo yiu ta wordo inscribi oficialmente. Mientras tanto, ora bo haci e registracion e no ta garantiza ainda”, Cindy a reitera.
El a splica cu e parti di schedule ta cuminza 7.30 or di mainta cu muchanan mag di yega, pero e programa ta cuminza net 8’or di mainta te 12’or di merdia. Esey kiermen cu desde 12’or di merdia mayornan por pasa busca e muchanan y ta pidi pa por fabor mayornan ta na tempo pa busca nan tambe.
“Pa locual ta e programa, nos tin diferente actividad tanto deportivo como di otro temanan, manera Ciencia, Tecnologia, Astronomia, Arte tambe nos tin aden. Kiermen, e ta un programa hopi amplio unda boso yiunan ta bay siña di diferente topico”, Cindy Peña a indica.
El a agrega cu lo bay tin diferente coordinador of personanan cu ta bay ta na encargo na cada campamento.
Tocante e programa el a indica cu nan ta bay pool y hiking, pa conoce Aruba su naturaleza na Parke Arikok. El a reitera cu ta importante pa e muchanan yega na tempo, y pa e dianan cu nan ta bay afo, no keda den e Kamp.
PAÑA COMODO:
Cindy a menciona cu importante pa trece na e campamento ta: paña comodo, unda e muchanan por ta comodo cu nan mes, no bin cu jeans ni cu shortnan hopi cortico, preferiblemente pa nan bin cu nan mesun short escolar pa haci gym.
BOTER PA BEBE AWA:
Cindy a subraya cu naturalmente den e campamento ta bay tin hopi awa pa bebe pa nan haci uso di dje, y pa contribui cu naturaleza no ta bay haci uso di hopi cup. “Nos ta prefera pa e mucha trece su boter marca y asina nos ta evita di haci uso di tanto cup”, e coordinadora a enfatiza.
BISTI PECHI:
Ta importante pa e muchanan trece pechi, aunke esaki ta opcional. Pero door di e calor ta necesario ya cu nan ta bay ta den solo.
NO TABLET, CELULAR, ETC:
Tambe ta importante pa e muchanan no trece tablet, telefon, ni joya di balor, pasobra IBiSA no ta para responsable pa cualkier cos cu e muchanan lo por perde.
CUMINDA:
Pa loke ta e aspecto di cuminda, IBiSA lo zorg pa provee e muchanan cu cuminda saludable unda nan ta haya un variedad. Tambe nan lo haya fruta, pero si e mayornan ta ripara cu e muchanan ta alergico of no ta come cierto cuminda, tambe ta un opcion pa e mayor manda su yiu cu e cuminda cu e ta come.
