E ta tocante cooperacion den Reino
ORANJESTAD (AAN): Riba 17 y 18 di november 2026 e gobiernonan di Aruba, Corsou, Hulanda y Sint Maarten lo reuni na Sint Maarten pa e prome cumbre (“Kingdom Summit”). E Kingdom Summit ta un reunion gubernamental di nivel halto entre e gobiernonan di e paisnan autonomo di Reino. E cumbre ta dedica na fortifica e cooperacion entre e cuater paisnan di Reino.
Durante e Kingdom Summit cada pais ta tene su propio "State of the Nation". Den e presentacionnan aki, e prome ministernan lo refleha riba e exitonan y e retonan di nan respectivo paisnan y lo pone enfasis riba e areanan di maneho riba cual cooperacion nobo of mas estrecho ta posibel.
Cooperacion ta esencial pa un Reino cu ta resiliente y cla pa futuro. Respet mutuo pa otro su posicion, e conexion mutuo y e boluntad pa yuda otro, ta pilarnan importante bou di e cooperacion ey. E Kingdom Summit aki ta duna e oportunidad pa fortifica y profundisa e lasonan entre e gobiernonan. Ademas, e cuater paisnan ta pa mas continuidad y coherencia den e consultanan periodico entre e gobiernonan.
Minister Presidente di St. Maarten, Dr. Luc Mercelina a declara: “St. Maarten ta mira cu anticipacion pa ricibi e gobiernonan di Aruba, Corsou y Hulanda pa e prome Kingdom Summit aki. Door di traha hunto y na mes momento tene cuenta cu nos diferencianan, nos ta construi riba un Reino mas fuerte y cu ta cla pa futuro”.
