Gino Goeloe, director di WGK:
ORANJESTAD (AAN): Director di Wit Gele Kruis, Gino Goeloe, a indica den entrevista cu DIARIO, cu tin un tendencia na bahada di cifranan di diabetes y complicacion di esaki, den e comunidad, y awo tin menos amputacion di pia. Eseynan WGK ta mira tambe.
No obstante, tin un situacion preocupante, y esaki ta cu tin mucha hopi jong cu ta haya sucu, y esaki ta bin door di come no saludable. Goeloe ta referi na muchanan di 12, 13 aña, cu ta come hopi 'fast food' y ta ingeri hopi sucu y vet.
Esaki ta e aspecto cu WGK ta enfoca na scolnan. E expertonan den POH a bishita 20 scol y a bay wak con e muchanan ta y kico nan ta haci y a constata cu tin hopi mucha cu sobrepeso y obesidad. Goeloe a señala cu djey caba por asumi cu e asunto aki no ta bon.
Pesey, entre mas trempan ta mira y trata e problema, ta hopi miho. El a subraya cu pesey e ta contento cu e Praktijk Ondersteunernan ta bay scol, loke no ta eigenlijk nan trabao; nan ta wak cu mayor ta bin cu nan yiunan y cu varios di nan tin sobrepeso. E ora ey WGK ta wak con nan por yuda tambe scolnan. Pero si nan bin cu scolnan saludable, por combati e problema aki di sobrepeso y obesidad cerca muchanan.
