E decision aki tabata uno mutuo
- Porfin un decision despues di tanto bululu
- A acerca contratistanan local pa finalisa e proyecto
ORANJESTAD (AAN): E ta parce di porfin ta yega e momento pa cera e capitulo scur, yen di dolor di cabez, momentonan bergonzoso, y di sorpresa cada rato pa cu e expansion y renobacion di Hospital di Aruba! SOGA a djis manda e Contratista General OHLA bay cas!
Esey a wordo confirma via un boletin oficial emiti di parti e representantenan di SOGA (Stichting Onroerend Goed Aruba) a indica cu manera a priminti, SOGA lo a mantene comunidad di Aruba informa tocante e situacion pa cu e proyecto di Expansion y Renobacion di Dr. Horacio Oduber Hospital (HOH).
"Despues di nos ultimo comunicado di prensa 3 di maart, SOGA y e contratista general OHLA a sinta na mesa y a yega na palabracionnan cu e partidonan no lo sigui cu otro mas y lo termina e contrato.
E decision aki tabata uno mutuo y a wordo yega na un manera amical.
Den cuadro di esaki tambe a wordo palabra cu e sub-contratistanan por traha directamente cu
SOGA, cualnan ta contratistanan local.
SOGA a cuminsa haci preparacionnan necesario y a acerca e contratistanan local pa sinta na mesa pa yega na palabracion pa nan caba cu e ultimo parti cu falta di e construccion lo mas pronto posibel. Esey lo encera tambe cu SOGA lo mester evalua y posiblemente consulta cu su Stakeholders pa despues otorga e trabou na e contratistanan local.
SOGA tin e confianza cu dentro di algun siman lo por keda cla cu e contratistanan local y cu e
trabou pendiente na HOH lo por reanuda lo mas pronto posibel".
Tin di corda cu Stichting SOGA ta un fundacion sin fin di lucro crea cu e proposito di renova e edificionan existente of crea edificionan nobo pa alberga e diferente departamentonan gubernamental, cu ta presta servicio na e comunidad di Aruba.
