Bida di hende di nacemento te morto ta central den Hospital
- Mester traha pronostico di gasto debi na e avance cientifico
- Prevencion den Cuido Medico ta aplicabel pa Hospital tambe
ORANJESTAD (AAN)- DIARIO lo sigui insisti riba un reunion di Parlamento, cu no ta bay hunga politica cu e factor mas importante di un comunidad, cu ta bida y salud di ciudadanonan y tur persona cu bishita Aruba.
E bon funcionamento di hospital di Aruba no solamente ta sigura e bienestar basico di e pais, pero ta esencial tambe na un pais cu un economia cu ta depende di turismo cu ta depende tambe di e garantia di cuido di salud di e bishitante.
Hospital ta uno di e proyectonan di Bo Aruba, cu a fungi como presentacion di espectaculo politico cu a despita Pueblo di Aruba di realidad.
E careteranan a bira piscina na momento di yobida. E brug costoso casi a exigi pa pone parachute na auto cu haci uso di e construccion sumamente costoso.
Caya Grandi di Playa casi a muri pa motibo di e isolacion di e tiendanan cu tabata gosa di nan entrada ora e tabata habri pa trafico di vehiculo.
Asina nos por sigui y sigui pero sin duda Hospital a bira e drama mas costoso cu historia politico di Aruba a produci pasobra bida di e Arubiano ta directamente na peliger ora un hospital no funciona manera mester ta.
Pa atende cu hospital, mester duna contenido na loke un hospital ta.
Na Merca un hospital tin un licensia como instituo cu tin por lo menos seis cama. E ta duna servicio medico na Pueblo pa medio di e proceso di diagnostica problema di salud y brinda e cuido necesario cu e pashent mester ricibi.
Segun e Organisacion Mundial di Salud, un hospital mester tin por lo menos un dokter cu por atende pashent cu ta keda na e hospital, caminda e ta recibi e trato medico y paramedico cu e mester.
Manera DIARIO a splica ampliamente, un hospital no por wordo concretisa a base di politica pa haya voto pero mester ta un proyecto cu a base di conseho di expertonan riba nan tereno, ta duna contenido na e loke e centro di cuido medico ta duna.
E base y normanan di Salubridad Publico, cu mester duna contenido directo na e concepto democratico di e pais, cu ta base riba e bienestar di hende, mester culmina den e proceso di hospitalisacion, caminda profesionalnan riba tereno medico na diferente nivel, manera dokter, enfermeria, laboratorio, ta uni den e maneho total.
For di momento cu un pashent wordo admiti na hospital, su curriculum di salud ta e loke ta mas importante.
Esaki ta basa riba documentonan, cu ta splica desaroyo di su salud a base di tur problema cu el a yega di experencia den su bida.
Un problema di salud por ta e motibo pa cual un persona a wordo interna, aunke trafico, catastrofe na un pais, tambe ta manda hende hospital, cu mester ta prepara pa tur esaki.
Di e condicion di e cama, e cuminda cu ta wordo prepara a base di e dieta cu cada pashent mester, e remedinan cu mester bebe, e asistencia cu mester haya den higiena si e pashent no por bandona cama, mester di profeshonalnan riba nan tereno.
Esaki ta haci cu hospital ta un centro di experto riba tur tereno. Bon administracion di cuido medico y informacion di ciudadania ta culmina na hospital, mescos cu e maneho financiero cu e pais ta hiba y den cual ta percura pa bon usa di e placa disponibel pa e pashent.
E hecho cu politiconan na Aruba a scoge pa un sistema di seguro medico cu ta haci cu e pashent mester participa na e seguro pa e haya cuido, ta impone un responsabilidad mas grandi atrobe riba comunidad, cu ta wordo representa segun democracia dor di su gobernante y Miembronan di Parlamento.
Ta den e cuadro aki DIARIO pues, cu conocemento amplia pa investiga e proceso medico tan crucial pa felicidad di un pais, ta urgi pa no mira solamente e construccion pero pa Parlamento asegura su mes cu Aruba ta drenta un futuro den cual tur e condicionnan cu ta dicidi pa un bon cuido medico na un hospital ta presenta HOH, caminda yiu ta nace, hende ta preveni y lucha te caminda cu e por te awor contra morto!
