Parlamentario Ricky Hoek (MEP):
ORANJESTAD (AAN): E tema di Plan di Mayor, cual a drenta na vigor dia 1 di maart 2024, ta uno hopi importante pa sigui elabora riba dje mirando e relevancia cu e tin den comunidad pa loke ta e proteccion di e muchanan.
Parlamentario di Fraccion di MEP, Ricky Hoek a splica cu Plan di Mayor ta uno cu a cana su caminda te cu por fin el e bira un realidad. Ta un iniciativa di colega di MEP, Michella Steenvoorde-Lacle, ken a traha duro hunto cu su team riba e plan di mayor y e ley aki. Esaki ta un ley hopi importante pa loke ta trata e muchanan, Hoek a enfatisa.
E ley ta encera cu ora un pareha divorcia of separa, nan mester yega na otro pa asina pone riba papel kico ta bira e futuro di e yiu of yiunan, pa loke ta e responsabilidad di cada mayor, como tambe participacion di e yiu den e programa aki.
Ricky Hoek a indica tambe cu tur esaki mester sosode prome cu e divorcio yega asina leu. "Unabes cu e Plan di Mayor ta traha, ora cu yega dilanti di mesa berde, señor hues lo puntra pa e plan di mayor aki y esaki mester wordo poni dilanti pa asina mustra cu en berdad e mayornan a traha hunto na e plan di mayor cu ta na beneficio di e yiunan".
Den caso cu e acuerdo entre e mayornan no bay segun ta desea, kiermen cu no tin un plan hunto, e ora pa e casonan aki tin 'mediation' cu ta un persona cu ta bay para meymey y cu ta bay yuda den e proceso dunando e mama y e tata e guia, como tambe na e yiu. Na final, e plan di mayor lo ta pa percura pa e guia y educacion di e yiu den futuro, e parlamentario a enfatisa.
Pa aworaki, "nos ta sumamente contento cu dia 1 di maart Plan di Mayor a drenta na vigor y sigur esaki ta bay ta na beneficio di nos muchanan, pero tambe di e mayornan, di otro instancianan como tambe di e netwerk cu ta rond di e mucha, pasobra e mucha mester keda central", Parlamentario Hoek a finalisa.
