*Ta invita tur hende pa Poeta di Patria awe
ORANJESTAD (AAN): Minister di Finanzas y Cultura Xiomara Maduro Diaranzon durante un conferencia di prensa a papia riba e celebracion di Nos Himno y Bandera.
E mandatario a cuminza na bisa cu pa e celebracion di e aña aki, a bin cu e slogan: ‘Aruba Orguyo di nos Tur’.
“Nos tur ta orguyoso di nos pais y pesey mas cu claro e aña aki nos kier pone un acento special riba e parti aki”.
Riba e logo nos tin Aruba y hopi di e puntonan di cual nos ta sinti nos mes orguyoso, segun Maduro.
El a sigui bisa cu e luna aki a wordo habri den gran forma cu e festival di Un Canto pa Aruba su Himno y Bandera.
“Nos por a mira no solamente e adultonan, sigur esnan den e parti hubenil, nos muchanan y nos hobennan, cu a yega subi e escenario y trece un show tremendamente bunita”, segun e mandatario.
El a haci un invitacion na un y tur pa e actividad di awe cu ta, ‘Poeta di Patria’ na Fort Zoutman, unda cu e poetanan di nos pais ta bay declama poesia na honor di Aruba.
“No solamente esnan cu a nace na Aruba, sino tur esnan cu ta biba riba nos isla tin hopi cos di cual nan por sinti nan mes orguyoso”, segun e minister.
