ORANJESTAD (AAN): Riba Diadomingo dia 17 di Maart ta bay tuma lugar e Manifestacion Cultural y
durante un conferencia di prensa Junior Arends di Comision Celebracion Dianan Nacional (CCDN) a trece dilanti cu for di 6’or di atardi caba publico por yega Plaza Gilberto Francois Betico Croes.
El a splica cu ta bay tin un pre-show cu ta bay cuminza despues di 6’or, caminda cu e finalistanan di e festivalnan lo presenta nan cancionnan, prome cu e show oficial cuminza.
Alrededor di 19:30 e parlamentarionan y invitadonan ta yega, despues di cual pa 8’or lo toca e Himno di Aruba, sigui pa e mensahe di minister di Cultura relaciona cu 18 di Maart.
Despues di esaki lo tuma lugar presentacion di ganadornan di e Festival Un Canto pa nos Himno y Bandera, sigui pa un show special prepara pa e comision cu lo hiba como titulo, ‘Aruba Orguyo di Nos Tur’.
Arends a sigui bisa cu ta bay tin presentacion di diferente artista local tambe, den un show unico y diferente.
“Esaki ta bay ta acompaña pa e orkesta bao di direccion di e maestro Danny Koolman”, segun Arends.
El a sigui bisa cu manera semper ta bay tin diferente tent unda cu tur hende por saborea tur tipo di cuminda y bebida.
