ORANJESTAD (AAN): Aruba Juniors ta di luto cu perdida di nan miembro Juancho Tromp, pitcher estelar di e team di softball 60 plus.
Cu mas di 25 aña como miembro activo di Aruba Juniors, Juancho ta un di e hungadonan di softball cu mas aña hungando. Juancho a cuminsa su carera di softball cu Montaña Braves. Despues hunto cu su rumannan a lanta e team Westpunt Hitters.
Cu 50 aña e ta yega Aruba Juniors como pitcher. Cu Aruba Juniors Juancho ta bira 4 biaha campeon di Liga Mayor di Aruba. Tambe e ta gana Copa Clasico Luis Swaen, Torneo Himno y Bandera na varios ocasión, campeon intercambio Puerto Rico, campeón di e prome torneo Pais Corsou y varios otro titulo mas. E ta representa Aruba Juniors na varios pais entre cual Colombia, Ecuador, Corsou y Cuba, entre otro.
Banda Ai tabata un bon pitcher Juancho tabata un miembro ehemplar y hopi stima pa su compañenan di team y di directiva.
Juancho ta forma parti di e comision di softball hunto cu Amado Rosina y Ciro Schoop. Tambe el’a introduci feria durante e torneo Himno y Bandera pa yuda su team recauda fondo pa un viahe pa Colombia.
Ultimo Juancho tabata encarga cu e parti financiero di e team di softball 60 plus.
Sport Vereniging Aruba Juniors ta pidi tur miembro pa asisti na despedida di Juancho cual ta diabierna atardi 2'or pa 4'or na misa Santa Ana na Noord.
Nos amigo Juancho sosega na paz.
