Segun Errol de Freytas, presidente SNBA:
ORANJESTAD (AAN)-- Errol de Freitas, Presidente di SNBA, den entrevista cu Matutino DIARIO a expresa cu ‘mundo no ta para’ relaciona cu un proyecto cu e Asociacion tin cu tin di haber cu e terenonan di e refineria.
El a sigui bisa cu Venezuela tin mas di 300 biyon bari di petroleo, y no tin suficiente man y refineria pa sak’e. “Pero nan ta aumentando. Nan a bula di 600 pa 900 pa 1400 bari pa dia; Merca tin mester di gas y petroleo; Hulanda tin mester di mescos, y nos tin refinerianan di nos y nos hermana Isla. Nos no ta competidor, pueblo tin cu compronde cu e refineria di Aruba y esun di Curacao no ta competidor, ami no ta un refiner di nan , pero nos tin un specialista den nos Hunta di Directiva. Nos ta un complemento pa otro”, de Freitas a señala.
El a splica cu locual nan ta papiando na Aruba ta di upgrading. “Tuma e petroleo, saca e diluyente, manda nan bek pa Venezuela pa nan sigui” y esaki por trece opcionnan pa Aruba su economia.
“Tempo ta pasando, e teremoto na Venezuela no a yuda, mi por imagina mi cu nan tin otro prioridadnan cu nan tin cu haci, cu cierto cosnan na Venezuela ta tranca, pero tur cos ta pasa pa un motibo. Pasobra no t’ami akinan ta tranca, pero sikiera nan tin un motibo pa ta tranca”, de Freitas a relata.
El a agrega cu na e refineria tin suficiente tereno pa haci hopi cos. “Nos tin dos miyon meter cuadra cu nos mester reserva pa actividad di energia, di petroleo”, el a remarca.
El a acentua cu Aruba tin un Minister di Economia y Finanzas, y un Minister di Energia, cu e ta puntra na unda e ta? “Nos tin basta tempo di purba di haya Minister Dowers, cu a mustra di buena fe cu e kier sinta cu nos. Nos tin Minpres, cu a zorg pa nos tin un hende den su oficina cu nos tin contacto direct cu ne, mescos cu Minister di Turismo a zorg, cu Minister di Salubridad nos tin contacto, y di Minister di Infrastructura nos no sa nada di dje.
