ORANJESTAD (AAN)-- Minister di Deporte señora Gerlien Croes, den entrevista cu Matutino DIARIO a menciona e problema cu tin ta practica Drag Race, ta drift riba caya, pasobra no tin actividad na Palo Marga.
E mandatario a bisa cu si bin actividad na Palo Marga nan lo stop di drift riba caya. P’esey e mes a sinta cu varios representante di e deporte di drag race, y nan ta den busca di un pista. Ultimamente, e dignatario a papia cu e federacion nobo, riba e posibilidad di inversion den e tereno pariba di Palo Marga, pa un tipo di drifting. “Mi tin cu bisa cu nos tabata tin un bon combersacion cu nan, y nos tin bon comunicacion cu nan y ta pendiente di nan. Nos tin presupuesto poni un banda, pa traha riba e toren nobo y nos ta pendiente di nan.
Mi tabata akinan ultimo pa e anuncio di Estrella, y mi a puntra nan con a para, pasobra mi ta pendiente di nan, pa nos por haci e inversion necesario, pero organiza evento no ta den man directo di gobierno. E federacion deportivo encarga den e caso aki, recientemente a wordo oficializa y ta keda na nan discrecion pa organiza e eventonan necesario. Mi no sa kico precis mi por papia di por papia di situacionnan interno di federacionnan deportivo, pasobra un minister no ta hinca su mes directamente den e maneho di un federacion.
Mi por bisa si cu nos ta den bon comunicacion y si tin cosnan y necesidadnan mester wordo comunica cu nos, pero te unda nos tin autoridad y responsabilidad como gobierno”, Minister Gerlien Croes a subraya.
E mandatario a agrega cu si gobierno mester inverti den un pista di drag nan mester cuminza cana e caminda, y mester sa cual ta e tereno y cuanto e lo costa pa cuminza cana e presupuesto si tin e inversionnan cu nan lo mester. E toren mesun cos. “Mi bishita aña pasa durante un evento, mi a bisa nan cu mi ta bay pone un presupuesto pa un toren nobo, y esaki ta pendiente aworaki pa nos haya sa di nan banda tambe, kico ta nan necesidadnan, pa por diseña e toren y nos por bay inverti den dje”, Minster Gerlien Croes a relata.
