Confirmacion relatonan di DIARIO ta expone peliger pa futuro
*Pregunta serio si tin hobennan Arubano cu tambe ta victima
*Profesionalnan cu debe di estudio ta paga cinco bez mas interes
ORANJESTAD (AAN) — Con e situacion mundial actual lo afecta futuro di mundo y asina di tur pais? Con e caida financiero mundial, ta afecta no solamente e ciudadano productor di mañan pero tambe e generacion cu a termina su estudio y mester paga un beca?
Recientemente DIARIO a informa su lectornan cu studiantenan cu actualmente ta disfruta di un prestamo pa estudio di parti di Estado Hulandes, pero tambe profesionalnan cu mester paga un debe cu nan a haci pa por a studia, mester bay paga un interes mas halto.
DIARIO a bati alarma pa e resultadonan cu esaki tin pa e estudiantenan pero tambe pa e profesionalnan cu for di nan entrada mester paga nan debe di estudio cu awor ta subi considerabelmente.
Ayera Den Haag, Hulanda, tabata den atencion na momento cu organisacionnan di studiantenan a lanta para contra e aumento di interes riba nan prestamo di estudio.
Profesionalnan cu a termina nan estudio pero tambe mester paga mas, tabata parti di e protestanan di e grupo di profesional cu awe y den futuro mester sirbi e exigencianan di nan comunidad, pa loke ta trata conocemento cu mester di un base di estudio avansa.
Aumento di costo di bisa, e inflacion tremendo cu e situacion a causa for di 2022, ta haci cu hopi estudiante y profesionalnan hoben ya ta den problema y no por aumenta nan peso financiero.
E profesionalnan cu por, mester mira con nan ta aumenta nan entrada pero esnan cu un profesion cu ta mara na tarifanan impone, ta den un situacion sumamente dificil.
Na mes momento e situacion actual lo resulta den e forma cu profesionalnan liber pa haci esaki, lo dicidi pa nan prijs den futuro imediato.
Alarma ta bati, manera informantenan a trece dilanti, actualmente, pa cuminsa atende cu e circulo vicioso cu problemanan mundial ta causa pa futuro cu ta na encargo di hobennan, cu ta wordo afecta pa situacionnan cu nan no a provoca.
Informantenan ta papia hasta di inhusticia enfrente e generacionnan mas hoben pero tambe e comunidadnan di futuro, cu mester genera mas y mas placa pa nan por funciona, a base di e situacion mundial actual.
Estudio di algun aña ta resulta ya den debenan enorme pa hobennan, ya cu e taza di interes cu ta wordo aplica riba e prestamonan, ta depende di e taza di interes cu e instancianan oficial cu ta atende cu prestamo, mester paga.
Informacion directo cu DIARIO a ricibi for di Hulanda ta indica, cu tin estudiante cu ta contempla pone fin na nan estudio debi na e peso cu nan ta carga.
Costo di bida ta afecta nan na forma serio den un situacion mundial, cu ta afecta e bista di optimismo cu hobennan mester tin pa nan futuro.
Expertonan riba nan tereno cu DIARIO a acerca, ta indica cu comunidad awor mester cuminsa atende publicamente cu e problema aki y mester cuminsa analisa con debe pa estudio ta subi.
Si e prestamonan pa estudio na Hulanda ta asina halto, kico ta e caso cu asistencia financiero pa estudio na Aruba tin riba e diverso terenonan cu esaki ta posibel, incluso seguro pa financiamente di estudio?
Con esaki lo limita e cantidad di hobennan cu capacidad, pero cu no por sigui traha riba nan futuro?
Segun expertonan, cu ta encanta cu e aumento di asistencia cu hobennan ta ricibi di tanto organisacion actualmente den comunidad, ta considera cu mas informacion oficial mester bini dilanti e siman aki na Aruba riba un tema cu sigur ta importante pa e futuro di Aruba cu ta depende di e hoben profesional awe, e studiante di awe, y studiante den futuro!
