Minister Rene Herde:
ORANJESTAD (AAN): Durante un presentacion na Prensa, Minister di Infrastructura, Energia y Telecomunicacion, sr. Rene Herde a duna un splicacion tocante e situacion actual di Infrastructura y Vivienda.
Lamentablemente e estado general di Infrastructura na Aruba no ta manera mester ta. Mester bin cu un evaluacion amplio di e condicionnan actual di Infrastructura di pais Aruba. E caretera- y barionan tin falta di mobilidad y mantenemento structural y di calidad.
Tin oportunidad pa bin cu un proceso pa desaroya barionan nobo. Tambe tin posibilidad pa integra materianan den e scolnan cu ta conecta directamente cu trabaonan den Infrastructura y Construccion. Alavez por bin cu ‘best practices’ di Hulanda den planificacion y ehecucion di proyectonan di vivienda inovativo.
Actualmente e demanda pa vivienda a aumenta y a sobrepasa e disponibilidad drasticamente. Pa casnan social so, tin mas cu 4000 peticion y 50% di e peticionnan aki ta pa habitantenan cu un edad por medio di 55+ aña. Tambe tin demanda di hoben- y famianan pa casnan nobo di bon calidad y cu prijs pagabel. Tur esaki tin un impacto riba e calidad di bida y crecemento economico.
E prioridad ta pa bin cu modelonan di colaboracion y acceso na fondo pa vivienda. Alavez mester bin cu metodonan di construccion nobo pa asina acelera e produccion di vivienda.
Minister Herde su deseo ta, pa bin cu un sistema pa logra cu nos hendenan local por yega na nan propio hogar.
