Parlamento saliente cu diferencia di opinion cu Senado recien eligi
- Senado nobo en espera di contesta di Gobierno saliente di Hulanda
ORANJESTAD(AAN)- Dia di eleccion na Hulanda a bati na porta cu Aruba den un situacion di suspenso grandi.
Manera ta conoci, Gobierno Hulandes a dicidi cu Aruba no ta ricibi e interes special riba e prestamo di Covid-19 pasobra Aruba no a bay di acuerdo cu e introduccion di un RAFT, cu ta supervision di Reino riba asuntonan Arubano.
Siman pasa a bira conoci cu den Senado Hulandes tin un grupo importante cu no ta di acuerdo cu e decision di Gobierno y Parlamento Hulandes y preguntanan a bay pa Alexandra van Huffelen cu ta e Secretario di Estado pa Relacionnan den Reino.
Sinembargo, e eleccion di awe lo ta e porta pa salida di e Gobierno Mark Rutte mientras un constelacion nobo di Parlamento Hulandes lo reuni pa prome bez dia 6 di September proximo.
Informacionnan di ultimo hora a mustra ayera nochi cu manera DIARIO a adverti, e partido di Geert Wilders, PVV mescos cu e partido Partij van de Arbeid/Groen Links, tin posiblidad grandi pa sali ganador di e eleccion.
Esaki ta nifica cu imediatamente despues di eleccion, lo cuminsa cu e actividadnan cu mester conduci na un Gobierno nobo pa Hulanda.
Mientras Eerste Kamer no a duna e aprobacion cu e mester duna na e decisionnan cu a wordo tuma dor di Tweede Kamer y Gobierno Hulandes contra Gobierno di Aruba, awor den un situacion politico di cambio enorme, Eerste Kamer mester ricibi contesta di su preguntanan na Van Huffelen.
Eerste Kamer ya a conoce un eleccion na 2023 loke ta haci cu lo no tin cambio mas den e Senado cu ta refleho di e cambio cu ta wordo spera pa Parlamento Hulandes y Gobierno Hulandes tambe.
Informantenan a mustra cu e eleccionnan di awe ta sumamente importante pa e relacionnan den Reino tanto di un banda pa e postura di Wilders, pero tambe di otro banda pa partidonan cu tin chens di drenta Tweede Kamer, pues Parlamento Hulandes.
Manera DIARIO a anuncia, e eleccionnan di awe den Reino lo marca un momento importante pa e relacionnan den Reino tambe y sigur e asuntonan pendiente.
