Aproba unanimamente
ORANJESTAD: Diamars a trata den Parlamento di Aruba, e Ley di Plan di Mayor. E documento pa cu e ley den relacion cu e promocion di paternidad continuo despues di divorcio, lo worde yama ‘Ley di Plan di Mayor Obligatorio’. E ley ta encera cu mayor- di yiunan menor di edad cu ta bay separa of divorcia ta obliga pa ley pa traha un document legal yama ‘Plan di Mayor’, unda nan lo stipula con nan lo bay comparti e responsabilidadnan pa cu nan yiunan.
E minimo cu mester worde inclui den un plan di mayor ta un descripcion di con e muchanan ta worde envolucra ora ta traha e plan di mayor. Tambe ‘Respectvol ouderschap’, y con lo parti e responsabilidadnan di cuido di e mucha, con lo parti e areglonan di bishita, con y cu ki frequencia ta informa otro regardando e mucha.
Tambe lo inclui con ta tuma decisionnan conhunto cu ta importante tocante e mucha por ehempel over di tipo di scol, con ta comparti e costonan di cuido y crianza di e mucha (alimentacion), y despues por inclui otro detaye cu mayornan kier inclui (e.o. cuant’or ta bay drumi, huiswerk, straf, etc.)
Loket Plan di Mayor, lo ta bay cay huridicamente como un taki preventivo di Directie Voogdijraad y lo ta situa na Centro pa Hoben y Famia, unda tin varios NGO’s bao mesun dak. Ey mayornan por acudi pa un intake gesprek caminda e professional lo indica den ki fase di conflicto e mayornan ta encontra nan mes y lo referi e mayornan na e intervencion cu mas ta pas pa nan situacion.
Durante tratamento di e ley, a menciona tur e trabaonan di estudionan haci caba riba e tereno social specificamente estudionan encamina pa Comision Plan di Mayor den colaboracion cu CBS, Dept Social y Directie Voogdijraad cu ta demostra e necesidad di e ley importante aki. Parlamento a vota unanimamente pa aproba e ley.
Presidente di Comision Plan di Mayor, Michella Steenvoorde-Laclé a gradici Gobierno, y Minister Tjon y tur profesional cu a kere den Proyecto Plan di Mayor y cu ta bay traha cune. Mayor bo ta keda pa semper, mester percura pa bo tine bon regla apesar di un separacion.
