E palabranan di Joop den Uyl ayera den e perspectiva di Reino awe
- Importancia logro y mantencion Status Aparte awor ta visibel
ORANJESTAD(AAN)- Mañan Pueblo di Hulanda lo depone su voto riba e partidonan y personanan cu lo forma parti di e Parlamento Hulandes, cu lo produci un Gobierno Hulandes nobo y un Gobierno di Reino nobo.
Pa comprende kico por spera despues di eleccion, na prome lugar mester tene cuenta cu eleccion ta e forma cu Pueblo di un pais ta dicidi kende lo dirigi e pais y kico mester ta prioridad di gobernacion di un pais.
Na caminda pa eleccion 2023, DIARIO a splica Aruba for di e prome momento, cu uno di e factornan mas importante si e no ta esun di mas importante, ta e hecho cu Hulanda aunke e ta un pais financieramente poderoso, conoce pobresa creciente a base di maneho di e pais.
Si analisa autonomia den Reino ta yega na e caminda cu e rabo di porco ta krul. Statuut ta consisti di dos parti. E paisnan ta para riba nan propio pia, pero cu e boluntad pa sostene otro.
Statuut no ta papia di un deber pero claramente di un asistencia den necesidad.
Si ta Hulanda semper mester a sostene e teritorionan financieramente, por papia di forsa financiero y economico propio di acuerdo cu Statuut?
Tin discrepancia cu nunca a wordo soluciona, manera entrada y permanencia di e Hulandes Europeo na e teritorionan Hulandes den Caribe.
Mester splica si bon cla, cu no ta migrante Arubano ta e problema grandi di Hulanda pero migracion, manera Aruba tambe conoce den su region, cu ta basa riba probresa y problema na paisnan mucho mas grandi den vecindario.
Awe factornan importante ta culmina cu eleccionnan na Hulanda, cu kier un cambio pa su propio situacion dificil y su aporte y responsabilidad financiero den Reino, cu ta uni e pais Europeo, Hulanda, cu seis isla den Caribe.
Loke si ta un asunto importante ta cu “Steunend op Eigen Kracht” ta papia directamente di independencia financiero di paisnan den Reino, cu no ta realidad y cu na cierto forma Hulanda mes a yuda fomenta den e union financiero di Antia Hulandes, cu a rementa den man di Hulanda ora Aruba a pidi su Status Aparte, cu Hulanda a nenga, te ora Aruba a mara esaki na Independencia.
Hulanda a honra e deseo di Aruba of Aruba a cumpli cu loke tabata tin den cabez di e gobernante Hulandes?
Un pregunta sumamente importante cu sigur den e situacion actual, ta haci cu experencia propio den pasado ta exigi pa awe como productor di Analisis, mi profundisa den suceso di pasado.
Na 1973, mi persona no tabata periodista pero parti di esfuersonan internacional pa dirigi e fluho di turista Hulandes cu tabata bay Mediteraneo, pa e islanan Hulandes den Caribe.
Ta na un recepcion special den cuadro di e proyectonan aki, mi combersacion cu otro invitadonan a wordo interumpi. Un persona sin mas a dicidi di uni su mes na e grupo tabata Joop den Uyl cu a interumpi sin disculpa, pa proclama cu tur isla Hulandes den Caribe, mester a bira independiente.
E contesta cu mi a duna su persona, tabata motibo pa un prominente columnista di Den Haag, pidi mi un entrevista a base di e forma cu mi a responde impertinencia di Prome Ministro Joop den Uyl na 1973, diez aña prome cu Status Aparte pero mara na Independencia a bira realidad pa Aruba, cu despues a sigui lucha y logra mantencion di su Status Aparte.
Kico ta e diferencia entre Status Aparte y Independencia pa Reino? E responsabilidad financiero di Reino den Status Aparte ta termina cu Indepencia estatal cu ta deshaci di asistencia financiero cu “wil elkander bij te staan”” ta encera.
Realmente nada a cambia den pensamento di Gobierno di Reino te awe y a bira evidente den e blackmail di Alexandra van Huffelen cu inhustamente lo a destrui autonomia di Aruba.
Awe cu mas furor cu e tempo tabata e caso cu Joop den Uyl, politiconan nobo ta presenta riba plataforma Hulandes, cu a haya sosten den e maneho descabeya cu a wordo hiba cu e debe nacional di Aruba cu a resulta den supervision Hulandes.
E pronosticonan di ayera ta indica cu un situacion cu exigencia grandi pa mundo politico Arubano, ta dilanti porta.
E exigencia mas grandi ta encera, cumplimento di deber sagrado, pa fortalece stabilidad di Aruba den temponan di inseguridad grandi riba tereno internacional y den Reino!
