Pelicula local “BLACKOUT” cu 3 nominacion na India

ORANJESTAD (AAN): Cu hopi orguyo e productor local Angel Soto ta anuncia cu su pelicula “Blackout” di e aña aki a causa furor ultimo na e Northeast International India Film Festival (NIIFF) 2022.

            Tabata den september ultimo cu e pelicula a wordo estrena na Aruba. E storia tabata di e reportero “Juancho” cu a trata di alerta autoridadnan local cu Aruba tabata na punto di wordo ataca pa Alemannan. Ningun hende a kere.

            Cu e estreno a bini invitacion tambe pa varios film festival internacional y t’e siman aki cu Angel Soto a ricibi e noticia grato aki. Blackout a haya 3 nominacion pa e final cu ta 12 y 13 di december den Naithu Resort na Dimafur, Nagaland,  India.  Blackout ta nomina pa Best Feature, Best Director y Best male Actor.

            For di awo  ta felicita Angel Soto y tur e elenco di Blackout deseando nan tur exito den e final.