Payroll Pro HRM a anuncia distribuidor nobo y un mercado nobo

ORANJESTAD (AAN): E siman aki, Gamma IT Solutions a anuncia cu a firma un contract cu un distribuidor nobo cu ta Zamcorp y asina Payroll Pro HRM ta oficialmente drenta e mercado di Guyana.

   Riba 2 november den e ballroom di Pegasus Hotel na Georgeotown, Guyana, e partnership entre Zamcorp y Gamma IT Solutions a worde haci oficial.

   Payroll Pro HRM ta un software di payroll y Human Resources cu ta hopi conoci na Aruba y henter Caribe.  El a worde crea specificamente pa tur cliente di e region Caribe, door di desaroyador di software local, Gamma IT Solutions.

Payroll Pro HRM ta conta cu diferente distribuidor cu tin mas di 25 aña ta bende, implementa y support e pakete di software den diferente parti di nos region Caribe.

   Zamcorp tin mas di 5 aña ta duna servicio na clientenan den e sector publico y priva. Nan tin un ekipo profesional y cu hopi experiencia den e area di accounting software y lo ta encarga cu e benta y support di Payroll Pro HRM den e mercado di Guyana.

   E director di Zamcorp, Irzad Zamal ta comparti “Payroll Pro HRM ta adapta na e mercado di Guyana y na e leynan di belasting local, e ta cumpli cu tur e exigencia di e banconan local y lo yuda pa procesa payroll di un manera mas lihe. Ademas, e tin hopi funcionalidad manera e self-service portals unda cu usuarionan por log in via nan mobile app y haci un peticion na nan departamento di HR.”

   Gamma IT Solutions ta orguyoso di por asocia cu Zamcorp y tin e meta di por hiba e beneficionan extraordinario di Payroll Pro HRM na organizacionan comercial y gubernamental na Guyana.

   Frank Baks, Director di Business Development ta comparti, “Nos semper ta hopi contento di por expande den un mercado nobo y nos tin confianza cu Zamcorp tin e motivacion y experiencia pa por alcansa hopi cliente nobo na Guyana.”

   Gamma IT Solutions y Zamcorp lo traha hunto pa e crecemento di Payroll Pro HRM den e Mercado di Guyana.

   Claramente, Payroll Pro HRM ta birando cada dia cu pasa un producto importante di exportacion pa Aruba. E software local caba ta worde uza na Curacao, Bonaire, St. Maarten, St. Eustatius, Saba, Suriname, Jamaica y awo Guyana.

   Gamma IT Solutions ta contento di por comparti Payroll Pro HRM, un software local, cu mercadonan nobo den exterior.