MetaCorp a laga traha un rolstoel special na Alemania

Ethan Geerman ta e unico pashent cu EB na Aruba

ORANJESTAD (AAN): Ethan Geerman tin shete aña di edad y a nace cu Epidermolysis bullosa (EB), un enfermedad genetico hopi straño. E t’e unico mucha cu tin e aki na Aruba y e enfermedad ta bin cu su dificultadnan.

   MetaCorp a haci un donacion na Ethan den forma di un rolstoel. Eddie de Veer, CEO di MetaCorp a bisa di ta consciente cu e enfermedad di Ethan ta unico na Aruba y cu tin di haber cu e genesnan y cuero. E mucha no tin suficiente proteccion.

   Peticion di Studiante: Tur cos a cuminsa cu un peticion di un grupo di studiante di Universidad di Aruba, pa MetaCorp cumpra rifa pa yuda Ethan. Pero, a pensa cu en bes di yuda cu rifa, kisas ta miho pa cera conoci di cerca kico ta e necesidadnan di e mucha mes.

   Asina MetaCorp a drenta den contacto cu e mama, Shahaira Geerman, cu a splica e retonan cu nan ta biba cu ne tur dia. Asina hunto a busca tur informacion necesario di con pa traha un rolstoel na e necesidad y tamaño di Ethan cu su crecemento na mente.

   E proceso p’e Rolstoel: E proceso tabata uno largo, caminda mester a compila tur informacion necesario pa e rolstoel. A canalisa tur cos via e fysiotherapeut prome cu a yega na e diseño final y pa order esaki for di e compania Sorg di Alemania, un compania specialisa den rolstoel.

   E rolstoel aki lo percura pa Ethan no perde su mobilidad propio y toch lo logra di keda na un parti independiente. 

   Tocante e enfermedad: Epidermolysis bullosa (EB) ta un enfermedad raro cu ta provoca herida y ta haci bo cuero hopi fragil. E heridanan por aparece debi na lesionnan chikito, incluyendo door di calor of si bo grawat’e of rasc’e. E ta un enfermedad genetico unda cu e curpa di Ethan no ta crea e proteina pa por wanta su ultimo dos laag di cuero.

   Cualkier friccion na su cuero ta causa blaar y ta bira herida grandi. Den casonan mas severo, por haya herida y cuero fragil hasta den bo curpa, por ehempel den bo boca of den stoma. E enfermedad ta bin debi na un “gene” defecto. Ta calcula cu un den cada 50 mil mucha na mundo ta nace cu ne. Lamentablemente ainda mundo no a desaroya un cura (remedi) pa preveni ni pa cura e enfermedad aki. Ta cuestion di siña biba cu ne, cu tur consecuencia cu e ta trece cu ne.

   Danki na tur cu a yuda: Eddie de Veer a gradici tur hende cu a yuda den e proceso aki. Su staf na oficina cu a sinta pa varios ora ta yama Alemania of pa manda e-mail.

   Obviamente na Shahaira Geerman mes cu tabatin e pasenshi pa por a tolera e yamadanan di MetaCorp, pasobra cada biaha tabata pidi nan detaye nobo. Y ta gradici Ethan tambe cu a acepta e donacion aki.

    E reto di tur dia: Shahaira Geerman ta mama di Ethan y a conta cu den e condicion cu su yiu ta aden, tin hopi reto. Un di e retonan ta movemento. Tur hende ta wak e ta cana, ta hunga futbol, e ta haci hopi otro actividad. Pero e tin su retonan. No ta tur dia e por move mesun bon. Por ta hende ta mira e parti bon of ta mustra e parti bon.

   Pero tin dia e ta pasa riba cama pasobra su pianan ta dolor, ta loke hende no ta mira. Esey ta haci cu e ta minimalisa su movecionnan. Den fin di siman, Geerman a comenta, cu no ta verbanta su pianan. Esey ta haci cu no por move bay ningun caminda.

    Un gesto valioso: Cu e rolstoel aki, ta brinda e famia posibilidad pa un miho calidad di bida. Lo por sigui disfruta di bay mira un pelicula den fin di siman como famia, sali bay come afo, na luga di keda un fin di siman na cas.

   Shahaira Geerman ta hopi gradicido p’e gesto haci di parti di MetaCorp. Pa cera e atardi bunita aki, MetaCorp a regala Ethan, hunto cu su grupo di amigonan y nan mayornan, pa gosa di e pelicula “Lyle Lyle Crocodile”.