ORANJESTAD (AAN): Diamars mainta Corte Superior a sigui cu tratamento di e caso IBIS caminda a concentra riba e acusacion di labamento di placa contra Paul Croes y Melony Croes-Paesch.
E tres Huesnan cu ta forma Hof y Procurador General (PG) a haci Paul Croes un serie di preguntanan caminda na dado momento Paul Croes a cuestiona cu Hof ta bin cu sugestionnan cu el a haci cosnan cu placa di e Fundacion Excelence cu no ta bon.
Tabatin momento cu Paul a bira hopi emocional y rabia pa e forma con Hof tabata haci preguntanan y e sugesionnan. El a pidi pa un pause cual Hof a dun’e tambe.
LABAMENTO DI PLACA:
Hof a atende cu Paul Croes e acusacion cu e a laba placa via su Fundacion Excelence.
Presidente di Hof a bisa cu dialuna atardi, abogado mr. Illes a presenta documentonan y esey a pone cu dialuna atardi a pospone e caso pa Diamars mainta.
RAPORT PA MUSTRA UNDA A HAYA PLACA:
E documentonan cu mr. Illes a duna Hof y PG ta investigacionnan cu a haci pa mustra con Paul y Melony a yega na placanan. Nan a mustra cu na nan casamento hendenan a duna regalo, cantidad di placanan y cosnan. Hof a mustra cu despues di 2 aña y mey ta mira cu a haci investigacionnan y a puntra pakico a haci esaki asina laat.
Segun Paul, den Promer Instancia, no a haya suficiente tempo pa haci esaki. El a splica cu awor a pidi ayudo financiero di famia pa asina por a laga haci e investigacionnan aki pasobra e ta costoso.
USA PLACANAN DI FUNDACION:
Hof a mustra cu por mira cu tin cantidad di gastonan di Restaurant cu ta worde inclui como gasto y si esaki ta parti di campaña politico. Paul a splica cu accountant ta haya cu esakinan tur ta forma parti di e gastonan di representacion.
Hof a puntra con e accountant por sa cu ta gastonan di representacion. Paul a mustra cu a base di e ponencia di Ministerio Publico cu ta malversacion na restaurantnan, a haci esaki. El a splica cu na restaurantnan tabata reuni cu hendenan ariba con ta hiba campaña pa eleccion. El a bisa cu presidente di e Fundacion Excelence, Capriles, a dicidi cu tur esakinan ta cay bao gastonan di representacion.
Hof a remarca cu Capriles a bisa otro cos. Segun Paul Croes, Capriles a worde forza door di LandsRecherche y palabranan tabata worde poni den su boca, pa perhudica Paul. El a bisa cu e tabata sa cu el a haci hopi gastonan y tabata duna varios recibo na Capriles.
PG a remarca cu si tabata haci gastonan y entrega recibonan na Excelence, no lo tabata mihor cu lo tabatin un credit card di Excelence. Paul a bisa cu e administracion no tabata perfecto y Excelence tabatin un cuenta di banco.
Hof a remarca cu Paul a haci compras di prendanan den joyeria y tabata pidi Excelence paga esakinan p’e. Hof ta haya esaki hopi straño. Paul a bisa cu door di tur e druk di campaña y trabao di minister, e no a para keto na esaki. El a bisa cu segun Capriles, esaki ta cay bao representacion. Hof ta remarca pakico no a busca un credit card di Excelence. Paul a mustra cu no a pensa esey e tempo ey.
PAUL TA REACCIONA RIBA HOF:
Hof a mustra cu for di investigacion por mira cu a haya na cas di Paul, e suma di 17.500 Florin.
Paul a bisa cu e 17.500 Florin tabata e entrada di concierto di campaña 2013. El a splica cu e tabatin e placa pa cubri gastonan di campaña cu ta bin despues di campaña.
Hof a cuminsa haci Paul un cantidad di preguntanan encuanto con el a anda cu placa y na dado momento Paul a reacciona hopi emocional y tambe rabia.
Hof a mustra cu Paul a haci prestamo tipo hipoteca na Banco y tabata paga su gasto di estudio via Fundacion Excelence cu e placa aki. Hof aki a puntra pakico Paul no tabata paga direct e estudio envez di bay via e Fundacion Excelence.
Paul a cuestiona Hof cu ta bin cu sugesion cu e a haci cosnan cu no ta bon. El a splica cu e tabata cumpra cosnan pa cas barata y tabata resta placa y esey e tabata paga su estudio.
MELONY:
Despues Hof a sigui cu Melony caminda a mustra cu Ministerio Publico a haci investigacion financiero na Melony su negoshi. A constata cu 209 mil Florin tabatin mas. Investigacion a mustra cosnan no ta cuadra. Melony a splica cu e no sa nada di accountant y pesey tin compania ta haci esey. Melony a bisa Hof cu Fiscal mr. Geretschen a bully nan masha hopi.
Segun Melony, LandsRecherche a interoga un empleado di confianza di su negoshi, kende a splica bon cla con henter e operacion di compania tabata bay y diripiente e declaracion aki no ta existi. E empleado a splica cu tur dia ta hiba recibonan pa accountant.
El a bisa cu Fiscal na final a bisa cu no tin nada contra Melony. Hof a mustra cu e rapport di accountant di Melony ta diferente di loke LandsRecherche a haci. Melony ta para riba cu no tin nada malo cu su negoshi manera Ministerio Publico ta pretende.
TRAHADOR ILEGAL:
Pa loke ta e asunto di trahador ilegal, Melony a splica Hof cu e no tabata confia hende cu su yiunan. E tabata busca hende pa wak pa su yiunan pero no a haya hende adecua. Su amistadnan a yuda pero no por a haya.
Pesey a busca un persona di Venezuela pa mira si e ta adecuado. El a bisa cu e situacion e momento ey a pone cu el a haci asina y ta pidi disculpa pa esey. El a bisa cu e tabata hopi ocupa pa traha.
Hof a remarca, pakico señora di un minister tin cu traha! Melony a reacciona cu e kier tin su mesun placa y no tabata depende placa di su casa. Esey ta su forma di ta. El a bisa Hof cu Paul tin su salario y e kier tin su mesun placa.
