ORANJESTAD (AAN): Esnan cu tin cu paga algun boet of cuenta pendiente mester tene cuenta cu Ministerio Publico lo no acepta pagonan cash mas entrante awe diaranzon 1 di september 2021.
Esey kiermen cu multanan, transaccionnan y cartanan di buena conducta (vog) no por wordo paga mas cu placa cash na caha di Ministerio Publico. Bo persona tin cu paga cu bo carchi di banco of creditcard, of online via banco.
E decision di Ministerio Publico pa no acepta pagonan cash mas ta tambe riba conseho di Banco Central di Aruba.
Ademas e ta un decision basa riba motibonan practico di maneho. Traha cu cobra, verwerk en entrega placa cash ta dificulta e maneho y ta alavez mas costoso cu otro formanan di pago.
