ORANJESTAD (AAN): Segun Meteo Aruba, e situacion general di tempo pa proximo 24 ora ta e siguiente: un ola tropical moviendo den parti oost di Caribe lo trece humedad den atmosfera regional.
Esaki lo pone cu temporalmente mas nubia lo por pasa riba e isla y produci un awacero pasahero te breve localmente cu tambe un chance chikito pa lamper cu strena.
Condicionnan maritimo/ estado di lama: ta spera un estado di lama leve na partinan
proteha, y modera na partinan zuid. Na partinan oost te noordwest lama lo ta modera cu olanan
entre 3 pa 5 pia.
Tempo tropical significante: Kate a bira depresion tropical y tabata situa na un distancia basta grandi noordoost di islanan ariba. Kate ta move noord y ta molester pa solamente
navegacion maritimo.
Un ola tropical banda di costa di Africa tin un chance grandi pa sigui desaroya y bira un
ciclon tropical durante proximo oranan.
Potencial di awacero pa proximo 24 ora: 1 te 5 mm; localmente esaki por varia.
Pronostico di tempo pa e proximo 3 dianan: parcialmente nubla cu un awacero pasahero te breve.
Biento lo ta for di direccion oost y modera te basta fuerte; fuerte te posiblemente duro den rafaga; temperatura (grado celsius) max / min lo ta: 34 / 28.
