Den situacion mundial serio Merca cu crisis politico na añanan 70
*Rusia ta libera Mericanonan na culminacion di eleccion Mericano
ORANJESTAD(AAN)—Merca ta bay urna electoral den situacionnan cu no ta solamente di importancia pa Merca, pero pa stabilidad mundial.
Pa informa lectornan corectamente entorno e eleccionnan Mericano, DIARIO mester por analiza e puntonan clave cu ta bini dilanti y ta exigi pa bolbe den pasado, pa den e loke a pasa ayera, por contempla awe y descubri puntonan comun cu pasado.
DIARIO pa atende cu eleccion presidencial na Merca, mester bolbe na Constitucion di e pais y e base democratico directo cu sigur ta wordo sostene den e forma cu na Merca, cantidad di representantenan di autoridad cu na otro paisnan ta wordo nombra, ta wordo eligi dor di Pueblo pa garantisa cu nan ta deseo di Pueblo y por sirbi interes di Pueblo.
Te awe, e punto basico den eleccionnan 2024 na Merca, ta keda e capacidad pa e Presidente di Merca atende cu asuntonan importante na nivel internacional, basa riba tur cualificacion cu mester presenta.
Merca mester eligi su Presidente a base di diferente tema den cual sigur e punto cu ta bini dilanti entorno participacion di Trump a base di casonan di Corte, ta bini dilanti.
Pues saliendo for di e punto di bista, cu un candidato pa e posicion di Presidente di Merca mester ta intachabel, na nos opinion, na e momentonan aki partidonan Mericano mester a dicidi si Merca pa su garantianan propio y mundial, ta beneficia pa un persona, cu un imagen na duda te na momento cu Corte di Husticia duna un contesta definitivo riba preguntanan habri.
Di otro banda nos ta puntra nos mes, si e candidato pa Presidencia cu a reemplaza Joe Biden y cu tabata su sombra den gobernacion di e pais, ta e candidato cu Merca mester na e momentonan aki.
Un pregunta, cu te awe nos no por contesta, pasobra te awe tur presentacion di Kamala Harris, no ta duna e contestanan cu mester pa por dicidi si e ta capaz na dirigi e mundo actual.
Pa nos sostene nos posicion, nos tambe mester presenta na nos lectornan, nos motibonan palpabel pa e exigencianan na cual nos ta tene nos mes.
Pa nos sigur esaki ta importante, despues cu durante e siman cu a pasa, diripiente Russia y Merca a logra yega na un acuerdo pa intercambia presonan politico hunto cu otro paisnan.
Den tur loke a keda publica, nos ta sinti falta di un punto. Pakico ta awor, Rusia ta dicidi pa intercambia presonan, cu den mayoria di caso pa no bisa tur di un solo bez, ta simpelmente hende cu Rusia a dicidi cu e ta encarcela a base di sospechonan cu Rusia no por a proba.
Di otro banda, e presonan Ruso cu a haya libertad, no a wordo detene sin mas na mundo liber.
Pero e intercambio aki si ta sostene e popularidad di e dirigentenan actual di mundo liber, sigur na Merca cu a logra hopi publicidad pa loke a pasa.
Putin no a baha cabez pa Biden ni otro dirigentenan mundial, pero Putin a logra cu su hendenan cu tabata den su servicio, a haya libertad.
Resumiendo e actual situacion mundial, nos ta bolbe na añanan 70 ora Presidente Richard Nixon di partido Republicano tabata na mando na momentonan mundial importante.
Nos ta papia aki di situacionnan di guera cu morto di Miles di Americano na Vietnam entre otro. El a logra acuerdonan cu China y Rusia y a duna inicio na e guera contra droga.
Riba tereno racial el a habri schoolnan pa hende di tur raza, hende a bay luna y situacionnan social na Merca a mehora.\
Pero Nixon a wordo gara y persigui den e caso di Watergate y mester a baha como Presidente, cu a wordo sigui pa Gerald Ford, cu pa motibo di e hecho cu e tabata Vice Presidente di Nixon, a perde ora el a midi forsa cu Jimmy Carter, cu a gana eleccion como Presidente Mericano.
Nos tabata parti di e cobertura directo di e forma cu Merca a atende cu e final di epoca di Nixon y asina Presidente Ford y e eleccionnan cu a pone Presidente Carter na poder como contesta democratico pa e comportacion di Nixon.
Presidente Carter mester a atende directamente cu problemanan serio cu tabata afecta mundo como lider mundial y a tuma decisionnan cu ta merece respet den un mundo na candela.
Un situacion cu awe sigur ta comparabel cu e realidad na Merca, caminda e caso Trump no por kita for di Donald Trump Kamala Harris pa splica mundo, kico nan intencionnan internacional ta.
Pues nos ta insisti cu personanan cu ta presenta nan mes como candidato pa Presidencia di Merca na e momentonan aki, mester por actua como lider mundial den e situacionnan actual.
Den e dianan nos dilanti, pues, mundo mester ricibi e garantia kico candidatonan di partidonan Mericano lo ofrece na mundo, caminda decisionnan di Gobierno Mericano tin resultado pa uno y tur!
