A otorga 247 fiansa pa sigui cu un estudio den exterior
*Pa Aruba tin en total 65 fiansa otorga
ORANJESTAD (AAN): Despues di varios luna di anticipacion y preparacion e momento grandi a yega pa studiantenan tuma e gran paso di sigui cu nan estudio. Algun di nan aki den region mes manera na Curaҫao, Canada, Puerto Rico of Merca, mientras algun ta scoge pa sigui aki na Universidad di Aruba of IPA.
E gran mayoria sinembargo ta keda scoge pa bay Madre Patria Hulanda. En total Minister di Enseñansa y Deporte hunto cu Minister di Finanzas y Cultura a otorga 247 fiansa pa sigui cu un estudio den exterior.
E cantidad di studiante cu ta sigui cu nan estudio den exterior ta reparti di e siguiente forma. En total tin 207 studiante cu ta bay sigui cu nan estudio na Hulanda di cual 118 ta haci uzo di e asina yama Arubalening Reisproduct. Esaki ta esnan cu ta bula riba e vuelonan organiza.
E studiantenan cu ta bay biba na Amsterdam, Arnhem, Den Bosch, Dronten, Enschede, Maastricht, Sittard, Nijmegen, Rotterdam, Tilburg, Utrecht, Wageningen y Zwolle ta sali diadomingo 4 di augustus 2024 pa 7.15 di anochi riba e vuelo KL 767 di KLM rumbo pa Amsterdam, Hulanda.
En total tin 58 studiante riba e vuelo aki.
E studiantenan cu ta bay biba na Breda, Delft, Den Haag, Eindhoven, Gouda, Groningen, Leeuwarden y Leiden ta sali rumbo pa Hulanda dialuna 5 di augustus 2024 pa 7.15 di anochi riba vuelo KL 765 di KLM. En total tin 60 studiante riba e vuelo aki.
Seccion di Studiefaciliteiten (Arubalening) di Departamento di Enseñansa ta pidi tur studiante pa tanto diadomingo como dialuna ta no mas tarda cu 4’or na aeropuerto pa check in. KLM ta habri su counter pa 4’or di atardi tur dos dia pa check in. Alavez Arubalening ta pidi tur studiante pa ta no mas laat cu 5’or y 55 di atardi na e Gate indica pa KLM bisti cu nan badge. Akinan lo tin un discurso chikito di su Excelencia Minister di Enseñansa y Deporte, Sr. Endy Croes pa despues cuminsa aborda pa 6.30 pm.
Pa locual ta trata e otro paisnan Seccion di Studiefaciliteiten ta informa cu tin 19 studiante cu ta bay sigui nan estudio na Merca, 7 na Canada, 5 na Curaҫao, 4 na Spaña y 1 na Puerto Rico.
Pa Aruba tin en total 65 fiansa otorga pa Minister di Enseñansa y Deporte hunto cu Minister di Finanzas y Cultura na studiantenan cu ta sigui nan estudio na Universidad di Aruba, IPA of EPI.
Banda di esaki tin e studiantenan cu ta bayendo sigui nan estudio na Hulanda sin Arubalening, e asina yama Freemovers. Seccion di Studiefaciliteiten no tin un bista di cuanto studiante exacto ta trata akinan, pero di e grupo aki 25 freemovers a acerca Cas di Aruba pa participa den e opvangweek y 5 freemovers ta bayendo riba e vuelo organisa.
Fuera di traha duro pa logra finalisa nan estudio pa por sigui cu nan proximo carera academico sea na Aruba of den exterior, studiantenan tabata tin hopi pa prepara. Un di e cosnan mas dificil sigur ta busca vivienda na Hulanda, cual no ta un problema unicamente pa esnan internacional pero tambe pa studiantenan di Hulanda mes.
Mayoria di nos studiantenan a logra haya un camber caba y algun falta un camber ainda pero ta premira cu nan lo keda cla tambe.
Seccion di Studiefaciliteiten ta desea di haci uzo di e oportunidad aki pa gradici SSC di Corsow cu a yuda Aruba e aña aki cu 14 camber den e region di Den Haag.
Di parti di Departamento di Enseñansa y Studiefaciliteiten nos kier a desea tur studiante hopi exito cu e proximo paso aki. Corda cu bo enfoke principal ta bo estudio, pero sigur tuma e oportunidad di crece y adkiri conocemento y experiencia di bida durante di bo añanan como studiante. Nada no ta imposibel basta bo traha p’e, keda cu respet pa bo mes y pa otro. Keda semper kere den bo mes y bo soñonan special. Aruba ta wardabo bek pronto cu bo diploma.
“Education is the passport to the future, for tomorrow belongs to those who prepare for it today.” -Malcolm X
