ORANJESTAD (AAN): Otmar Oduber di Plataforma Pais a reuni cu directiva di FTA y a atende varios topico di interes nacional.
Manera ta conoci, Plataforma Pais ta realisando un serie di encuentronan cu diferente instancia na Aruba pa asina presenta e vision y pensamentonan innovativo di e Plataforma pa loke ta trata futuro di nos isla.
Un di e topiconan cu a haya atencion tabata e reduccion di gastonan di gobierno, cual Otmar ta considera cu mester ta sine qua non. Ta premira cu 12% ta loke por wordo reduci. E ta di opinion cu no mester warda te ora bin cu medida atrobe pa bay negocia cu gobierno, pero mas bien mester crea e espacio pa haci esaki. “E gobierno cu ta bin na mando otro aña mester compromete di awo caba cu e reduccion di gasto aki mester tuma lugar”.
Durante e reunion cu FTA a papia di con facilmente por logra esaki, realisando diferente accionnan y cu boluntad y deseo por logre. Esaki ta algo cu pueblo lo kier mira, esta wak gobernantenan cu lo bin na mando otro aña, compromete di baha e gastonan na cas pa despues crea entradanan nobo pa nos clase trahador.
Relaciona cu e ultimo punto aki, a papia cu directiva di FTA riba e ley di BEL (Beneficio Economico Laboral) pa medio di cual e clase trahador na Aruba ta participa den e ganashi di e compania pa cual e ta traha. E beneficio aki no lo tin un efecto di belasting pa e trahador ya cu e no lo mester paga belasting riba dje y e no lo tin impacto pa e doño di trabou, ya cu e lo por desconte di su winstbelasting.
E idea aki ta uno totalmente innovativo pa Aruba y e meta tras di dje ta cu e trahador ta bay haya un aumento substancial riba su entrada for di e compania pa cual e ta trahando sin cu esaki tin consecuencia.
Tambe a papia cu FTA riba introduccion di impuesto indirecto manera un BTW, cual tabata lo cual tur tempo y tur partido a papia riba dje, pero no tabatin e curashi pa introduciele. A busca e parti mas facil di e BTW cu ta e BBO y a introducie pasobra esey ta trece placa directamente den caha di gobierno. E otro parti cu no a wordo introduci ta cu e ciudadano tambe ta haya mas placa den su saco y e mes lo dicidi na unda e ta gasta e placa aki.
Costo di bida haltisimo tambe a haya atencion durante e reunion, mescos ta e topico di legalisacion di e trahadornan cu ta na Aruba ilegalmente. Otmar ta contento cu FTA a bin dilanti cu e topico aki y a papia di 2500 persona inicialmente. Durante e reunion a coincidi cu e 10 mil ilegalnan cu tin na Aruba nan tur ta trahando y e personanan aki no ta contribuyendo cu loonbelasting, AZV, ni SVB. Nan no ta forma parti di e circuito oficial di Aruba su economia y no tin un control riba e entradanan cu gobierno no ta ricibiendo na e momentonan aki.
Mester remarca un punto relaciona cu e legalisacion aki, e personanan cu wordo legalisa mester pasa por lo menos durante renovacion di nan prome 3 permisonan den un proceso di inburgering pa nan conoce y sa mas di Aruba, pasa cursonan di Papiamento, Certification Program, etc. Asina lo guia e personanan aki pa ta parti di nos comunidad y ta bon representantenan den e servicio pa mehora calidad di Producto Aruba.
Di parti FTA a papia riba e diferente cambionan cu mester bin pa loke ta leynan laboral. Otmar Oduber tabatin e honor di ta e persona cu a realisa varios cambio den leynan laboral y awe e ta bisa cu loke FTA ta papia di dje ta al caso. Ta trata di cambionan sumamente chikito, pero cu lo beneficia drasticamente e clase trahador. E cambionan aki mester por wordo introduci y ta cambionan cu no ta perhudica e dunador di trabou.
Finalisando Otmar a cataloga e reunion como uno fructifero y positivo unda a elabora riba diferente topiconan di interes pa comunidad di Aruba y cu mester wordo atendi pa un siguiente gobierno.
