ORANJESTAD (AAN) – Lider di Fraccion di Partido di Pueblo Arubano AVP den Parlamento di Aruba, Jennifer Arends-Reyes,
ta extende su mas sincero pabien na Sra. Evelina ‘Landa’ Cohen Henriquez - Jansen pa su reconocemento cu e 'Cross of Merit in the First Order of the Order of Merit' di e Republica Federal di Alemania.
E distincion prestigioso aki a bin for di Embahador Nikolaus Meyer - Landrut di Republica Federal di Alemania pa Reino Hulandes, durante su prome bishita oficial na Aruba, y ta representa un reconocemento bon mereci pa e mas di 25 añanan di servicio di Cohen Henriquez-Jansen como Consul Honorario di Alemania na Aruba.
Den nomber di Fraccion AVP, Arends-Reyes a expresa su profundo gradicimento pa e dedicacion di Cohen Henriquez-Jansen den transcurso di añanan, considerando e como un berdadero embahador di e pueblo Arubano y di su balornan mas noble: servicio y amistad.
Su contribucion a fortalece e lasonan diplomatico y a sirbi como ehempel di con e dedicacion individual por crea brug entre nacionnan, sin importa distancia geografico.
