Terapista di FAVI Sary Wernet-Kelly:
- Aruba tin e espacio y ta stima bestia
ORANJESTAD (AAN) E Terapista di Rehabilitacion di FAVI, Sary Wernet-Kelly, den entrevista cu Matutino DIARIO a comenta cu e cachonan cu ta entrena pa yuda personanan cu limitacion visual of ciego, pa cana riba caya, ta un di e miho yudanzanan cu tin pa nan.
Wernet-Kelly a bisa cu ta un hopi great idea si den futuro FAVI por tin cachonan di guia, pero tur cos mester bin na su lugar. E no ta un tarea di FAVI directamente, pero e por ta un yamado na hobennan cu kizas ta haciendo un estudio pa desaroyo actualmente, por ta por pensa den train cachonan, pa guia. “Por ta institui un fundacion, cu por entrena cachonan pa ‘walking dog’ ya sea pa yuda hendenan cu limitacion, autismo, problema di salud mental.
Den varios area cachonnan di guia ta wordo busca, y entrena, pero claro esey ta un specialismo cu tin cu studia p’e. Actualmente, nos tin un persona di vacancy na Aruba cu su cacho cu yama Karen. E hoben ta yama Percy, y el a duna nos hopi informacion caba. Pa fin di e luna aki, FAVI lo organiza un lectura pa comunidad, pa esnan interesa cu lo kier sa con un cacho di guia ta, y cu e kier uno, y kier sa kico e gastonan mara na dje ta” señora Sary Wernet-Kelly, a comenta.
E ta sugeri esnan interesa pa keda wak riba FAVI su facebook, pa bin scucha e lectura, y el a haci un yamada pa e generacion nobo, y pa e politiconan hoben den Parlamento of Gobierno, pa corda cu cacho di guia ta un bunita opcion. El a subraya cu Aruba tin e espacio, y tambe ta un pais cu ta stima bestia y tur hopi organizacion cu ta rescata cacho for di riba caya.
