Parada Grandi di San Nicolas tabatin 222 Polis riba pia

ORANJESTAD (AAN): E Parada Grandi di San Nicolas di Diasabra mainta, tabatin en total 222 funcionario Policial riba pia, pa asina yuda pueblo celebra Carnaval como debe ser.

     Vocero policial Liliana Rasmijn a indica cu Diasabra pa 9:59’or di mainta Polis conhuntamente cu SMAC a haci inicio di e Parada Grandi na San Nicolas.

   Tabata tin 10 grupo, last lap y mas o menos 4.300 participante.

   Cuerpo Policial a conta cu 222 personal riba pia. Diferente departamento di Polis a traha hunto entre otro Polis Uniforma, Mobiele Eenheid, AE, Motor Unit, Flex Team, K-9 , Mobile Commando, planologie, Trafico departamento di recherche, Personal administrativo y  tambe personal di CEA.

   Pa 2:40 pm, e cabez di e parada a yega Joe Laveist Sports Park y pa 7:13 pm, pues anochi e parada a yega su final. 

   E aña aki a conta cu 19 detencion. Entre otro pa: bringamento, no sigui ordo di polis, arma blanco (machete y cuchiu), posesion di droga y buracheria. Pues por mira cu ainda tin hende ta sali di cas pa bay Carnaval, cu machete den nan poder.

   Compara cu Carnaval 69, pues na aña 2023 tabatin 14 detencion.  Pues e ta un aumento di 36 porciento.