ELMAR y SETAR ta anuncia otro Atardi Informativo tocante uzo di Pay.Aw pa cliente di SmartUp

ORANJESTAD (AAN):  ELMAR y SETAR ta satisfecho di e exito di nan evento colaborativo dirigi pa educa clientenan di SmartUp Prepaid y EV ChargeUp 

tocante e uzo di e aplicacion Pay.Aw pa recarganan di SmartUp y ChargeUp. E evento, teni Diamars riba, 6 di Februari, na Showroom di ELMAR Oranjestad for di 5:00 pm pa 8:00 pm, a brinda participantenan cu conocemento y asistencia pa facilita nan experiencia di facturacion.

            Durante e Atardi Informativo, clientenan tabata tin e oportunidad pa ricibi guia personalisa for di miembronan di ambos ekipo di ELMAR y SETAR, sigurando cu nan a sali ekipa cu e conocemento y hermentnan necesario pa transaccionnan sin problema.

            "Awor cu mi por recarga den solamente 3 clicks, mi ta sinti mi hopi mas relaha," a comparti un cliente satisfecho di SmartUp di ELMAR.

            Testimonionan di clientenan a resalta e conveniencia y eficiencia cu nan a experiencia uzando e aplicacion Pay.Aw pa compra di coriente SmartUp Prepaid:

            "E ta un gran beneficio pa nos, awor ta mas rapido," a expresa un otro cliente di SmartUp for di ELMAR.

"Tin ora cu bo no tin auto of bo ta na trabou, pero awor bo por recarga online, e ta hopi facil, I love it," a suma un cliente di SmartUp di ELMAR.

            E testimonionan a enfatisa e impacto positivo di innovacion digital riba experiencia di cliente, demostrando e compromiso di ELMAR y SETAR pa brinda solucionnan conveniente pa nan clientenan.

            Den contesta na e exito di e evento, ELMAR y SETAR ta anuncia cu lo organisa otro sesion informativo den futuro cercano.

            E siguiente Atardi Informativo ta riba diahuebs, 15 di februari, for di 5:00 pm te cu 8:00 pm na SETAR Seroe Blanco. E clientenan di SmartUp y ChargeUp ta bonbini pa pasa cualkier momento durante e evento.

            Pa esnan cu no por a asisti, informacion adicional tocante e uzo di e aplicacion Pay.Aw pa recarganan di SmartUp y ChargeUp ta disponibel riba e pagina di YouTube di Pay.Aw: www.youtube.com/@pay.aw2977.