Papa Leo XIV a ricibi un yotin di Aruba

ORANJESTAD (AAN): Un reunion internacional y interreligioso na Roma tabatin presencia di e rabbi local,

Alberto (Baruch) Zeilicovich eynan tambe pa conmemora e di 60 aniversario di e Declaracion riba e Relacion di Iglesia cu religionnan no-Cristian, conoci como ‘Nostra aetate’, cu na latin nifica “Den nos tempo”.

   Sesenta aña pasa, e Nostra aetate a declara cu e momento a yega pa reconoce cu tin elementonan positivo den tur religion y cu e stereotipo y prehuicio religioso por wordo supera via di dialogo interreligioso.  Na 1965, e documento a pone fin oficialmente na cualkier postura catolico contra pueblo Hudiu y a establece cu Iglesia Catolico ta “condena e odio, e persecusionnan y manifestacionnan di antisemitismo dirigi contra Hudiunan den cualkier momento y door di cualkier persona”.

   E aniversario e aña aki a wordo marca pa e dialogo interreligioso y e presentacionnan di diferente tradicion Cristian, e fe Musulman, y perspectivanan Budista.  Entre e representantenan Hudiu tabatin tabatin rabbi Zeilicovich y su casa Graciela, di e synagogue Beth Israel di Oranjestad, Aruba.

   Rabi Zeilicovich a obsekia na Papa Leu XIV un moneda di 50 cent (“e yotin”) di Aruba como parti di su presentacion, y a comenta cu, mescos cu e moneda cuadra di Aruba, e hecho cu e ta diferente cu tur otro moneda, toch e no ta perde su balor.

   El a afirma asina cu “mesun cos ta socede cu personanan, hopi hende ta diferente: Nan tin un color di cuero diferente, un religion diferente, discapacidadnan, y djis pasobra nan ta diferente, nan no tin balor?  Tur ser humano tin balor no obstante e diferencia, manera e moneda di 50 cent di Aruba.  Por fabor, Su Santidad, acepta e moneda aki como simbolo di espirito di reconciliacion, respet y paz di Nostra Aestate.”