Hose Figaroa, presidente di FTA:
ORANJESTAD (AAN) – Presidente di Sindicato FTA, mr, Hose Figaroa, a sigui relata den entrevista cu DIARIO, cu algo cu no mester lubida ta cu na unda cu Aruba su economia ta sostene riba dje, y sigur pa loke ta trata nos mercado laboral tambe, ta depende hopi di hoteleria.
“Un gran parti di nos trahadornan aki na Aruba ta emplea den e sector aki y, pues un bahada den ocupacion di camber, por tin un efecto na termino medio y largo pa e trahadornan aki. Pues, e ta algo cu nos ta mira e preocupacion. A tende tambe, hopi biaha parti di e problema por ta e prijs di camber aki na Aruba; Aruba no ta un destinacion barata. E ta un destinacion bastante costoso, compara cu resto di Caribe y asina mes nos ocupacion ta halto, pero nos mester mantene nos producto tambe na e nivel di loke nos ta cobra, y esey ta algo cu nos no mester perde enfoke riba dje”, Hose Figaroa a señala.
Un di e atractivonan di Aruba, banda di nos hendenan, ta e seguridad tambe. Continuamente bo ta lesa esaki den publicacionnan internacional, Hose Figaroa a señala.
“Pero tambe e calidad di nos producto mester ta halto. Specialmente awo cu ta yobe hopi, bo ta wak nos infrastructura loke ta caminda, no ta no ta manera mester ta. Anto un hende cu ta paga un prijs asina, berdad e ta keda den un hotel hopi bunita, pero pafo di e hotel ey e no ta refleha e balor di locual e ta paga”, Figaroa a subraya.
“Pues ta importante pa nos enfoca hopi riba e calidad y hasta subi e calidad di nos producto pasobra esaki no solamente ta atrae e turista, pero tambe ta dune mas satisfaccion cu e ta pagando un producto caro pero e ta hayando e balor di loke e ta paga p’e” Hose Figaroa a remarca.
