Pabien na tur musico di Aruba riba Dia di Santa Cecilia

Ministerio di Cultura y Departamento di Cultura Aruba

ORANJESTAD (AAN):  Despues di mas di 12 siglo di e morto di e martir romano, na aña 1594, Santa Cecilia a ser declara e patrona di musica y musiconan pa Papa Gregorio XIII. For di e stempo ey cu hopi forsa y conviccion su figura tabata ser venera como e abogado di e musiconan y esaki a bin ta tuma lugar universalmente. Su fecha natal a ser adopta mundialmente como e dia di celebracion di musica y musiconan.

            Desde siglo XVII na varios paisnan di Europa a celebra e fecha aki cu festivalnan musical. E hoben Cecilia cual a ser martirisa den aña 230 a ser honra cu e Patrona di musica pa e storianan cu tabata ser conta den su martirio cu ta data di siglo V. Na momento di su morto e tabata canta na su unico Señor (Dios) mientras instrumentonan musical tabata zona y e tabata bisa: “inmacula mi curason y curpa”, pues sin mancha y sin defecto.

            Nos por admira riba e imagennan di Santa Cecilia den pleno alegria tocando instrumentonan musical den presencia di Señor. Papa Gregorio XIII a nombra Cecilia Patrona di tur musiconan pasobra el a sa di demostra un atraccion iresistibel na su forma di interpreta melodianan y harmonia riba e instrumentonan. Su spirito sensible y apasiona pa e arte a haci cu a converti su nomber den un simbolo di musica.

            E obhetivo principal di e dia aki no ta solamente pa pone atencion riba e importancia di e arte musical rond di mundo pero tambe pa promove e union, paz y amistad cu musica ta causa. Ta bon conoci cu e arte di musica ta kibra tut barera y ta trece union entre nacionnan.

            Pesey awe Departamento di Cultura Aruba (DCA) cumpliendo cu su labornan di documenta biografia di nos artistanan Arubano. A pone esakinan online via www.coleccion.aw. Tambe DCA ta trahando pa finalisa cu e publicacion di e buki di ‘Biografia di nos Artistanan Arubano’. Tambe DCA ta trahando den un cooperacion estrecho cu Arubaanse Muziek School (AMS) pa cu e educacion musical y ta sostene diferente proyecto di musica en general.

             Di parti di Ministerio di Cultura y DCA  ta  desea tur musico, cu ta crea y interpreta musica, masha pabien ariba e dia aki cu ta Dia di Santa Cecilia, Patrona di Musiconan. Danki pa aporta y contribui na e bunita forma di arte aki cu ta un parti esencial di e expresion musical di nos cultura.