*Prome Minister e dia ey lo lansa ’16 Days of Activism’
ORANJESTAD (AAN): Dia 25 di November UNHCR, e agencia di refugio di Nacionnan Uni ta bay organiza un marcha violencia contra genero, esaki como parti di e 16 dia di concientizacion riba violencia contra muchanan muher y hendenan muher.
“E asina yama 16 Day of Activism against Women and Girls ta un campaña annual cu ta cuminza riba 25 di November, cu ta e Dia Internacional pa Eliminacion di Violencia contra Hendenan Muher”, segun Manouck Wagner di UNHRC.
E campaña ta core te cu 10 di December.
Wagner a sigui bisa cu e tema escogi pa Nacionnan Uni e aña aki ta ‘Unite, Invest to Prevent Violence against Women and Girls’.
“Esaki ta un invitacion pa para y sostene diferente strategia di prevencion, pa para violencia di ocuri na prome lugar”.
Violencia contra genero ta un violacion di derechonan humano y un violacion cu por tin consecuencianan fatal, cu na un manera desproporciona ta afecta hendenan muher y muchanan muher, segun Wagner.
El a indica cu ta wordo calcula cu 1 di cada 3 hende muher mundialmente ta wordo impacta.
Segun Wagner, entre otro e pandemia di COVID-19 hunto cu cambio di clima a intensifica mas ainda violencia basa riba genero y a trece cune mas tipo di menaza.
El a splica tambe cu e vulnerabilidad di hende muher ta aumenta mas ainda, door di inseguridad economico y proteccion social limita.
E experiencia di pasa den violencia contra genero tin consecuencianan negativo riba bienestar fisico, emocional y social di hendenan muher.
Esaki ta impacta e desaroyo profesional di hende muher t nan empoderacion economico.
UNHCR, Hyatt, CEDEM y algun otro organizacion a uni pa aumenta concientizacion, pa preveni e tipo di violencia menciona.
Pesey a organiza e marcha cu ta bay tuma lugar riba 25 di November.
Esaki ta cuminza na corte na Oranjestad pa 5’or di atardi y lo termina pa 18:30 na Parlamento, unda cu Prome Minister Evelyn Wever Croes oficialmente ta bay lanza e ’16 Days of Activism’ na Aruba, door di cende e color oranje na Parlamento.
