Pa Gobierno ta importante stimula mas negoshi pa explora e balor di materialnan recicla

ORANJESTAD (AAN): Durante conferencia di prensa, Minister Ursell Arends a indica cu den simannan benidero individuo of companianan priva por haci un "pitch"

caminda por comparti nan idea con pa yuda reduci of cambia e destino di desperdicio via un video cortico na e website www.trashtocasharuba.org. 

Riba 22 di maart durante "Trash to Cash" Waste Management Solutions su forum lo presenta e finalistanan di esnan cu a upload nan idea. Durante e forum lo haya e oportunidad pa pitch nan idea completo na un panel.

E deseo di e mandatario ta pa hunto cu tur esnan cu tin un idea pa procesa of traha cu material procesa, nan cuminsa cu e actividadnan aki mas pronto posibel.

Minister Arends a splica cu asina tin partnernan den comunidad cu ta haci e trabou di procesamento, lo continua na proximo fase den e maneho nobo di desperdicio: legislacion manera un "Waste Policy" cu ta bay reenforsa tur esfuerso den maneho di desperdicio.

Pa Gobierno ta importante pa stimula mas negoshi pa explora e balor cu e materialnan procesa di reciclahe por tin, pa asina tambe mas por participa na e solucionnan grandi den Aruba su maneho di desperdicio. Minister ta urgi comunidad pa bishita www.trashtocasharuba.org pa asina participa y trece dilanti bo idea!