Minister di Husticia y Asunto Social Rocco Tjon:
ORANJESTAD (AAN) – Minister di Husticia y Asunto Social, señor Rocco Tjon, den un entrevista cu DIARIO a felicita Comerciantenan Uni di Aruba, cu nan conferencia di prensa reciente. E mandatario ta aplaudi e intencionnan cu tin pa inverti den Caya Grandi, y for di su Ministerio tambe e kier duna un aporte pa cu esaki; obviamente, e ta toca e parti di seguridad, e ora ey.
Un di e preocupacionnan cu CUA tin ta e problema di adictonan ambulante cu ta cana den e ciudad. Den esaki e dignatario a afirma cu e aspecto di adictonan ambulante tin su atencion, y aña pasa caba el a introduci un team cu ta consisti di un tipo di profesionalnan cu, literalmente, den nan auto ta core riba caya y ta convence e adicto pa bay un instancia cu nan, unda nan lo haya cuido y yudanza.
Esaki lo amplia otro aña; e ta presupuesta caba pa 2025. Esaki ta net pa parti di cuido, pero banda di esaki mester wak e parti di seguridad tambe, segun e mandatario a splica.
El a subraya cu pa e motibo aki, na un manera lihe, SETAR ta ehecutando e proyecto di camara pa Oranjestad (Down Town Area) y pa fin di aña 47 camara en total lo ta ekipa y esaki, obviamente, lo haci e trabao di polis mas facil y mas eficiente, pasobra por dirigi nan, mucho mas facil, na momento ora di wak cu disturbio ta tuma lugar, of ora un turista ta wordo molestia, of e adictonan ta purba di kibra un negoshi. Pues, esaki ta bay tin, e dignatario a acentua.
