E Trayecto Formacion Social ta un bon reto pa tur hoben

Jessy Ras, Coordinadora di SVT:

*Ya tin cu a bira militar y dos cu ta siguiendo e opleiding na Curacao 

Den entrevista cu Jessy Ras, Coordinador di SVT (Trayecto Formacion Social), a menciona cu nan ta pone atencion na cada tipo di enseñanza cu e hoben tin, pasobra cada un tin un dia pa inscribi.

Jessy a indica cu hopi hoben tin interes pa sigui cu e opleiding militar, y si e tin un diploma MAVO of ekivalente, ya por cuminza informa tocante e opcionnan cu tin. Presenta na SVT cu nan documentonan y conecta cu tur e tiponan di enseñanza p’asina nan tin algo pa haci.

            Tin hobennan cu ta bisa cu nan tin interes pero despues nan ta mustra cu esey no ta e caso. Pero tin cu enberdad tin interes y nan ta inscribi, haci e opleiding y ta caba esaki, y despues di e trayecto ta sigui pa e opleiding militar.

            “Nos semper tey pa duna informacion y guia.  P’esey semper nos ta enfoca riba e hobennan pa caba cu e trayecto tambe”, el a indica y ta encurasha e mayornan pa nan motiva nan yiunan pa bin cerca dje pa duna nan informacion, pasobra kizas nan tin un otro informacion cu no ta corecto”, Jessy Ras a señala.

            El a bolbe reitera cu SVT no ta solamente pa hobennan “mala mucha”. Tur tipo di hoben cu nan diferente caracter tin den e opleidingnan, tin un par cu a haya problema di comportacion pero cu na caminda ta cambia esaki. Pero tin variacion den e gruponan.

            El a bolbe bisa cu e trayecto ta dedica na hoben entre 17 cu 24 aña y nan por mire como un oportunidad pa bay den e opleiding militar, pero tambe den kazerne tin hopi oportunidad, y si e hoben no tin nada di haci of no por haya trabao, esaki ta un trayecto p’e.

            Ras a bisa cu ta bay haci diestres aña cu nan a cuminza cu e trayecto y a instrui 16 grupo di mucha homber y dos grupo di mucha muhe, pues en total 18 grupo, y awor ta bezig cu un grupo cu a caba di cuminza. E tin su frutonan, por wak cu tin hobennan cu a haci e trayecto y nan ta bon para, nan tin trabao, y tin di nan cu ta militar caba. Un di nan ta e prome dama cu ta na Curacao haciendo su opleiding di militar y ta bayendo super bon, y tin un mucha homber cu tambe ta bezig cu su opleiding militar na Curacao. Durante e añanan tabata tin hopi cambio cu a wordo haci na beneficio di e hobennan mes. Pues SVT ta un bon reto pa e hobennan.