*Bisti 'lifevest' manera ta subi na lama
*Y tuma tur medida di seguridad
ORANJESTAD (AAN) – Mark Solognier, Hefe di Kustwacht Aruba, den entrevista cu DIARIO a haci un yamada na doñonan di boto, pa e dianan aki ta cauteloso y evita loke a sosode poco dia pasa.
Solognier a expresa cu esaki ta un temporada unda cu “Lama ta bay bin”, manera ta wordo bisa. Tambe e tin un conseho pa e piscadonan pa ta na haltura di kico ta sosodiendo riba lama, y di e tempo cu tin pa avisa e famianan unda nan ta bay, ki ora y ki ora nan ta bin bek, locual ta hopi importante.
El a comenta cu locual a sosode, lamentablemente, tin di haber cu e cambio di clima tambe. “Nos ta teniendo cuenta cu esey, tambe nos diferente patruyanan cu tin riba lama ta bez ta controla, no solamente e piscado pero e botonan en general, pa loke ta regarda seguridad riba lama.
Ta sosode normalmente cu e patruyanan riba lama ta controla e documentonan, pero tambe riba e aspectonan di seguridad, y ta aconseha e usuarionan concerni pa tin nan documentonan abordo, na cada momento.
Nan ta controla tambe locual e piscado mester tin riba e boto, manera “marine radio”, si tin awa abordo, e 'lifevest' (jacket salbabida) aunke e persona no ta sinti comodo ora bistie pa un tempo largo. Pero e ta necesario y importante, pasobra bo no por sa kico por pasa den un frega di wowo. E ta aconseha bisti e 'lifevest' mesora cu subi na lama.
